Toshkent viloyati sportni rivojlantirish bosh boshqarmasi nogironlar kuniga atab bir nechta tadbir o'tkazdi

Har yili 3 dekabrda nogironligi bo'lgan shaxslar kunining nishonlanishidan asosiy maqsad, butun dunyoda amalga oshiriladigan dastur va loyihalarda nogironlar sog'lom insonlar bilan teng huquqlilik asosida ishtirok etishini, nogironlarning manfaatlari, huquqlari inobatga olinishini, barcha mamlakatlarda nogironlarning qadr-qimmatini himoyalovchi qonunlar va tartib-taomillarning joriy etilishini taminlab, barcha uchun ochiq va do'stona bo'lgan jamiyat qurishdan iboratdir.

Mamlakatimizda ham nogironligi bo'lgan insonlarning manfaatlarini himoya qilish, ularni jamiyatimizning to'laqonli azosi ekanliklarini ko'rsatish va his qildirish maqsadida turli tadbir va islohotlar amalga oshirilib kelinadi.

Xususan, 3 dekabr - Xalqaro nogironlar kuni munosabati bilan Toshkent viloyati sportni rivojlantirish bosh boshqarmasi ham viloyat bo'yicha xayrli tadbirlarni amalga oshirdi. Aynan mazkur boshqarma tashabbusi bilan Xalqaro nogironlarni kuniga bag'ishlab viloyatning barcha tuman va shaharlaridagi imkoniyati cheklangan bolalar uchun ixtisoslashtirilgan yordamchi maktablarda tarbiyalanayotgan o'quvchilar uchun "Quvnoq startlar" o'yinlari, shaxmat-shashka kabi sport turlari bo'yicha o'ziga xos qiziqarli sport tadbirlarini tashkil etishdi va yakunda ishtirokchi bolalarga turli xil sovg'alar ulashildi.

Jumladan, ushbu sport tadbiri CHirchiq shahridagi 23-sonli imkoniyati cheklangan bolalar uchun ixtisoslashtirilgan yordamchi maktabda ham o'zgacha shukuh bilan o'tkazildi. CHirchiq sport maktabi tomonidan uyushtirilgan shaxmat-shashka bellashuvlarida esa o'quvchilar bor mahoratini namoyon etishdi. 

Tadbir so'nggida Toshkent viloyati sportni rivojlantirish bosh boshqarmasi tomonidan ajratilgan sport kiyimlari jamlanmasi o'quvchilarga berilgani ular uchun ajoyib sovg'a bo'ldi.

Ilhom RAHMONOV tayyorladi