Toshkent viloyatida sport bellashuvlari avjida

Xususan, Toshkent viloyati jismoniy tarbiya va sport boshqarmasi tomonidan viloyatning shahar va tumanlaridagi sport maktablarida, jismoniy tarbiya va sport bo'limlarida, umumiy o'rta talim maktablarida beshta muhim tashabbusning ikkinchi tashabbusi ijrosi bo'yicha sport tadbirlari, bellashuvlari o'tkazilmoqda. 

Jumladan, 17 fevral kuni Qibray tumanidagi umumiy o'rta talim maktablarida futbol, shaxmat va “Quvnoq startlar” musobaqalari tashkil etildi. 200 nafarga yaqin o'g'il-qizlar ishtirok etgan ushbu musobaqada kuchli uchlikdan joy olgan o'quvchilar diplom va esdalik sovg'alari bilan mukofotlanishdi. 

Zangiota tumanidagi 32-umumiy o'rta talim maktabida tuman jismoniy tarbiya va sport bo'limi va xalq talimi bo'limi hamda viloyat jismoniy tarbiya va sport boshqarmasi tassarufidagi BO'SM bilan hamkorlikda basketbol bo'yicha 7-9 sinf o'quvchilari o'rtasida basketbol bo'yicha tuman ochiq birinchiligi bo'lib o'tdi. Qiziqarli tarzda o'tgan musobaqaning yakunida g'olib jamoalar munosib taqdirlanishdi. 

SHuningdek, 13-19 fevral kunlari Toshkent viloyati jismoniy tarbiya va sport boshqarmasi boshlig'i sovrini uchun 2004 yilda tug'ilgan va undan kichik yoshdagi qizlar o'rtasida viloyat birinchiligi o'tkazildi. 

Voleybol sport turini yoshlar orasida ommaviyligini taminlash, iqtidorli sportchilarni saralash va viloyat terma jamoalarini shakllantirish maqsadida tashkillashtirilgan musobaqaning, dastlab, joylarda hududiy bosqichlari o'tkazilib, viloyat finaliga yo'llanma olgan jamoalar 19 fevral kuni Yuqorichirchiq tumanida o'zaro kuch sinashishdi. Yakunda ixtisoslashtirilgan bolalar-o'smirlar sport maktabi jamoasi g'oliblikni tantana qilishdi. Ikkinchi o'rinni Bekobod shahar jamoasi egallagan bo'lsa, uchinchi o'rin quyichirchiqlik qizlarga nasib etdi. 

Bugun, 20 fevral kuni esa Olmaliq shahrida viloyat jismoniy tarbiya va sport boshqarmasi hamda Olmaliq shahar jismoniy tarbiya va sport bo'limi, Olmaliq shahar bolalar-o'smirlar sport maktabi va viloyat boks federaciyasi hamkorligida boks bo'yicha 2004-2005 yilda tug'ilgan yoshlar o'rtasida musobaqa bo'lib o'tdi. Musobaqada Toshkent shahri,  Jizzax, Toshkent viloyatlaridan 150 nafarga yaqin sportchilar ishtirok etib, bor mahoratlarini namoyish etishdi. 

Etiborlisi, musobaqaga boks bo'yicha xalqaro bellashuvlarning g'olib sportchilaridan Jahongir Rahmonov, V. SHin, Azizbek Ozodbekov, Abdumalik Xalakovlar tashrif buyurishdi. 

Takidlash joiz, joriy yilning 6-10 fevral kunlari boks bo'yicha Kolumbiya  davlatida o'tgan xalqaro musobaqada J. Rahmonov barcha raqiblarini engib, oltin medalga sazavor bo'lgan. A. Xalakov esa mazkur musobaqada bronza medalini qo'lga kiritib, shohsupadan joy olgan edi. 

Musobaqa doirasida ushbu bokschilar Toshkent viloyati hokimligi tomonidan tasis etilgan qimmatbaho sovg'alarga ega bo'lishdi. Sovg'alarni viloyat jismoniy tarbiya va sport boshqarmasi boshlig'i Komiljon Adilov topshirdi. 

Ilhom RAHMONOV tayyorladi