To'ymurod Adizov: "Navoiy O'zbekiston chempionatini yuqori saviyada o'tkazishga tayyor"

Yilning eng asosiy musobaqasini odatdagidek yunon-rum kurashchilar boshlab berishadi. Ikkinchi kuni erkin kurash, so'nggi kuni esa ayollar kurashi bo'yicha O'zbekiston chempionatining g'olib va sovrindorlari aniqlanadi. Biz Navoiy olimpiya zaxiralari kollejining erkin kurash bo'yicha murabbiyi To'ymurod Adizovdan musobaqaga ko'rilgan tayyorgarlik mavzusida intervyu oldik. 

- To'ymurod Amrulloevich, Navoiy shahri qatorasiga ikkinchi yil ham kattalar o'rtasidagi O'zbekiston chempionatiga mezbonlik qiladi. Tayyorgarliklar qanday ketyapti?

- Tayyorgarliklarni deyarli yakuniga etkazdik. Bugun musobaqa o'tkaziluvchi yakkakurash zalimizda bezash ishlari yakunlanib, kurashchilar uchun shay holatga keltirib qo'yildi. O'tgan yili ham Navoiy shahri kattalar o'rtasidagi O'zbekiston chempionatini yuqori saviyada tashkil etib bergan edi. Bu safar ham o'tgan yilgidan kam bo'lmaydi deb niyat qilib turibmiz. Bu yilning eng muhim musobaqasi. Unda O'zbekiston terma jamoasi tarkibi aniqlanadi. 

- Umumiy uchta yo'nalishda necha nafar kurashchining Navoiyga kelishi kutilmoqda?

- Jami 450 nafar kurashchilar O'zbekiston chempionatida ishtirok etish uchun ro'yxatdan o'tgan. 

- Musobaqa mezboni sifatida navoiylik kurashchilarning tayyorgarligi yaxshi bo'ldimi?

- Albatta. Mashg'ulotlar Yakkakurash turlariga ixtisoslashtirilgan bolalar va o'smirlar sport maktabida kuniga ikki mahaldan kuchaytirilgan tartibda o'tkazildi. Mamlakat chempionatiga kuchlilar keladi. Endi tayyorgarligmiz qanday bo'lganini oldidagi bellashuvlar aniqlab beradi.

- Avvalo bu gilam, oldindan bir narsa deyish qiyin. SHunday bo'lsa-da, nechta medalga umid qilayapsizlar?

- Bor imkoniyatimizni ishga solamiz. Kattalar o'rtasidagi bellashuvlarda uchta yo'nalishdan kamida 10 medalni ko'zlab turibmiz.  

- O'zbekiston chempionatida sport kurashlari yulduzlaridan kimlarni ko'rishimiz mumkin bo'ladi?

- Terma jamoaga nomzod hamma kurashchilar shu erda bo'ladi. Rio Olimpiadasining eng yosh kurashchilaridan bo'lgan Abbos Rahmonovdan umidimiz katta. U viloyatimiz sharafini himoya qiladi. Eng katta yangiliklardan biri erkin kurashimiz afsonalaridan biri, ikki karra jahon chempioni, uch marotaba Osiyo o'yinlari g'olibi, Osiyo chempioni Dilshod Mansurovning katta sportga qaytayotgani bo'lib turibdi. Uning O'zbekiston chempionatida kurashishi kutilmoqda. 

- O'zbekiston chempionatida necha nafar hakam ishlaydi? Anchadan beri musobaqa yo'q. Ularga chempionat boshlanishi oldidan seminar o'tkazildimi?

- Jami 30 nafar hakam uch yo'nalish bo'yicha o'tkazilgan mamlakat chempionatida hakamlik qiladi. Musobaqa boshlanishi oldidan xalqaro toifadagi olimpiya hakami, O'zbekiston sport kurashlari associaciyasi hakamlar qo'mitasi raisi, "Oltin hushtak" sohibi Tohir G'ulomov hakamlar uchun seminar o'tkazdilar.