Turkiya elchixonasi V Islom birdamligi o'yinlariga tayyorgarlikda elkadosh ekanini bildirdi

Turkiyaning O'zbekistondagi Favqulodda va Muxtor elchisining o'rinbosari Alijan Aksoy bilan ushbu mavzu yuzasidan uchrashuv bo'lib o'tdi.

Mehmonni O'zbekiston Milliy Olimpiya qo'mitasi Bosh kotibi Oybek Kasimov va Qo'mita raisi o'rinbosari Azizjon Kamilov qarshi olishdi. Dastavval Alijan Aksoyga o'zbek sportining boy tarixi, atletlarimiz so'nggi Olimpiya o'yinlarida qayd etgan natijalar haqida batafsil malumot berildi. SHundan so'ng tomonlar hamkorlik masalalari bo'yicha muzokara olib borishdi.

Oybek Kasimov qardosh o'zbek va turk xalqlarining hamkorligini sport yo'nalishida davom ettirish, xususan, aloqalarni Konya shahrida o'tadigan V Islom birdamligi o'yinlariga tayyorgarlik orqali yanada mustahkamlash borasida fikr bildirdi. Azizjon Kamilov Qo'mita Bosh kotibining fikrini davom ettirar ekan, taniqli diplomatni oktyabr oyida Toshkentda dzyudo bo'yicha ilk bor bo'lib o'tadigan kattalar o'rtasidagi jahon chempionatiga taklif qildi.

Alijan Aksoy samimiy qabul uchun tashakkur aytib, hamkorlik rejalarini amalga tatbiq qilishga tayyor ekanini takidladi. SHuningdek, u Turkiyaning O'zbekistondagi elchixonasi oldinda turgan Islom birdamligi o'yinlariga delegaciyamizning tayyorgarligi va boshqa masalalarda qo'ldan kelgancha yordam ko'rsatishini bildirdi.

Suhbat davomida tomonlar kun tartibidagi qator mavzular bo'yicha o'zaro fikr almashib, hamkorlikning keyingi qadamlarini kelishib olishdi.