Uch kurashchimiz Eronda o'tkazilayotgan Pahlavon Mahmud turniri 1/2 finaliga chiqdi + FOTOGALEREYA

O'zbekiston Respublikasi Prezidenti sovrini uchun Pahlavon Mahmud xotirasiga bag'ishlab o'tkazilayotgan xalqaro turnirida dunyoning ko'plab davlatlaridan sara kurashchilar gilamga chiqyapti. Yurtimiz sharafini Rizamat Soliev murabbiyligidagi terma jamoamiz kurashchilari himoya qilishmoqda. 

Kurash bahslariga 50 000 tomoshabinni o'z bag'riga sig'dira oluvchi "Zeinal-Khan Traditional Wrestling Arena" mezbonlik qilmoqda. Kecha musobaqaning ilk kuni belgilangan ikkita vazn toifasida saralash bellashuvlari o'tkazilib, 1/2 finalga yo'l olgan kurashchilar malum bo'ldi. 

To'rt nafar kurashchimizdan birgina Umar Bozorov (-90 kg) saralash bosqichida tojikistonlik polvonga imkoniyatni boy berib, musobaqadagi ishtirokini yakunladi. Alixon Nodirov (-90 kg), Asror Hamidov (+90 kg) va eng sovrindor kurashchimiz Muhsin Hisomiddinov (+90 kg) 1/2 final ishtirokchisiga aylanishdi. 

Birozdan so'ng boshlanadigan 1/2 finalda Alixon Nodirov tojikistonlik Haqnazar Nazarovga, Asror Hamidov yana bir tojik kurashchisi SHarifjon Nazirovga, Muhsin Hisomiddinov esa rossiyalik polvon Anton Brachovga qarshi gilamga chiqadi.

Malumot uchun, musobaqaning umumiy mukofot jamg'armasi 10 000 AQSH dollari bo'lib, g'oliblar 3000 dollarga ega bo'ladi. Kumush medal sohiblari 1000, bronza medalga ega chiqqanlar o'z hamyonlarini 500 dollarga boyitib olishadi.