Uchtepada zamonaviy suv sporti saroyi foydalanishga topshirildi

Ushbu islohotlar mahsuli o'laroq, “Yoshlar kuni” bayrami arafasida Uchtepa tumani CHo'pon ota mahallasi hududida 2-sonli bolalar-o'smirlar sport maktabining yopiq suzish havzasi yangitdan qurilib foydalanishga topshirildi. 

Tantanali tadbirda Toshkent shahar jismoniy tarbiya va sport boshqarmasi, tuman hokimligi mutasaddilari,mahalla ahli va o'quvchi-yoshlar ishtirok etishdi. Toshkent shahridagi bolalar–o'smirlar sport maktablarida suv sport turlari bilan shug'ullanuvchi yoshlar namoyish etgan ko'rgazmali chiqishlari yig'ilganlarda katta taassurot uyg'otdi.

Ushbu yopiq suv havzasini qurish uchun 5,4 milliard so'm ajratildi. Obektda 11x25 metr o'lchamdagi suzish havzasi, murabbiylar, shug'ullanuvchilar uchun yuvinish, kiyinish, dam olish, tibbiyot xonalari, suvning tarkibi, sifati nazorat qilinadigan laboratoriya hamda tomoshabinlar uchun o'rindiqlar mavjud. Inshootda bir kunda 120 nafar o'g'il-qiz suzish sporti sirlarini o'rganishi uchun sharoit yaratilgan. Etiborlisi, bolalar-o'smirlar sport maktabiga 49 nomdagi jihozlar ham topshirildi.

Mazkur suzish havzasining foydalanishga topshirilishi yoshlar uchun quvonchli voqea bo'ldi. Endilikda uchtepalik yoshlar ham suv sporti turlari bilan professional shug'ullanish imkoniyatiga ega bo'lishdi.