UFC 301 turnirining asosiy kardida jang qiladigan Mahmud Muradov Pragada!

Xabaringiz bor, o'rta vazn toifasida o'z janglarini o'tkazib kelayotgan hamyurtimiz 4 may kuni Braziliyaning Rio-de-Janeyro shahrida tashkil etiladigan UFC 301 turnirida oktagonga chiqadi. O'sha kuni Muradovga braziliyalik Mishel Pereyra raqiblik qiladi.

Ushbu jangga tayyorgarlikning ilk bosqichini Toshkentda o'tkazgan yurtdoshimiz kecha Istanbul orqali CHexiya poytaxti Praga shahriga etib bordi. O'quv-mashg'ulot yig'inining ikkinchi bosqichi Muradovning ikkinchi vataniga aylangan CHexiyada o'tkaziladi. 

"Pragada mashg'ulotlarni o'tkazish uchun etib keldim. Rioga jo'nab ketish oldidan so'nggi o'quv-mashg'ulot yig'ini Polshada tashkil etiladi. Unda sparringlar ham o'tkazamiz. Bir necha yildan beri asosiy mashg'ulotlarim CHexiya va Polshada o'tkazib kelinmoqda. Bu safar ham ananaga sodiq qolamiz", - deydi Muradov saytimiz muxbiri bilan suhbatda. 

Malumot uchun, 30 yoshli Mishel Pereyra faoliyati davomida 42 ta jang o'tkazib, 30 g'alaba va 12 mag'lubiyat qayd etgan. U oxirgi jangini 9 mart kuni Mixal Olekseychukka qarshi o'tkazib, muddatidan oldin zafar quchgan edi. Qizig'i, Pereyra o'zining oxirgi 6 ta jangida g'alaba qozongan.