UFC bilan shartnoma imzolashni kuchli rus jangchilari istashmoqda, lekin faqat Xabibning jamoasiga bunday imkoniyat berilmoqda. Nega?

Yarim yildan beri Albert Tumenov va Rustam Kerimov o'z imkoniyatlarini kutishmoqda. Ularning har ikkisi ham Rossiyaning eng kuchli MMA promousheni - ACAning chempionlari hisoblanadi. Aynan UFC bilan shartnoma imzolash maqsadida ACA bilan kelishuvni uzaytirishmadi. 

SHuningdek, Rossiyaning kuchli yakkakurash ustalaridan Albert Duraev va Magomed Magomedov ham bir yarim yildan beri hech qanday jang o'tkazishmadi. Ular ham Tumenov va Kerimov singari UFCdan javob kutishyapti. Nega bunday? Nega faqat Xabibning jamoasi UFC bilan shartnomaga ega bo'lmoqda?

Xabibning jamoasi UFC bilan kelishuvning o'zgacha usulini o'ylab topganmi?

2019 yilda UFC faqatgina Roman Gogatov bilan shartnoma imzoladi.

2020 yilda esa Umar Nurmagomedov va Tagir Ulanbekov sayyoramizning eng kuchli MMA kompaniyasi bilan shartnoma tuzishga erishdi. Qizig'i, har uchala jangchi ham Xabibning jamoadoshi hisoblanadi.

“Xabibning borligi asosiy o'rin egallashi aniq. U UFCda ancha ishlarni amalga oshirib qo'ydi va bemalol tashkilot rahbariga iltimos qilishi mumkin. To'g'ri, uning jamoadoshlari ham kuchli lekin... inson omili ham katta o'rin egallaydi”, - degan edi Rossiyaning mashhur menejerlaridan biri Sayat Abdraxmanov.

UFCga Xabibning sherigi bo'lmasdan turib qaysi yo'l bilan chiqish osonroq?

2018 yilda Rossiyaning M-1 promouterlik kompaniyasi UFC bilan kelishuvga erishgandi. Yani, M-1 chempioni bitta himoya jangida ishtirok etganidan so'ng, UFC bilan shartnoma imzolash imkoniyatiga ega bo'lgandi. SHundan so'ng M-1ning sobiq sakkiz nafar chempioni UFC bilan shartnoma imzolagandi. Qolgan tashkilot chempionlarining UFCga o'tishi biroz qiyinroq kechmoqda.

Nega kuchlilarning UFCga o'tishi qiyin kechmoqda?

Rossiyalik ekspert hamda muxlislarning eng ko'p bergan savoli: Nega UFC unchalik kuchli bo'lmagan Sergey Xandojko bilan shartnoma imzolab, uni mag'lub etgan Albert Duraevga shartnoma taklif qilmagan. Bu savolning javobi hali hamon ochiqligicha qolmoqda.

SHlemenko UFCdan shartnoma kutmoqda, lekin bunga erisha olmaydi. Nega?

Rossiya MMA afsonasi, Bellator sobiq chempioni Aleksandr SHlemenko UFC bilan shartnoma imzolamoqchi ekanligini malum qilgandi. Lekin UFC 36 yoshli sportchiga shartnoma taklif qilmasligi aniq. Sababi SHlemenko bitta jangi uchun kamida 100 ming dollar oladi, UFC esa debyutant jangchilarga hech qachon bunday katta summa to'lamaydi.