UFC Umar Nurmagomedovga kutilmagan raqib beryapti

Juda katta ehtimol bilan u amerikalik Kori Sendxagenga qarshi oktagonga ko'tariladi. Hozirda Kori dvizion reytingida 4-o'rinni egallab turibdi. Bu haqda taniqli sharhlovchi Ariel Xelvani yaqin manbalarga tayangan holda xabar berdi. 

Bir necha kun oldin Umar Nurmagomedovning o'zi ham tashkilotdan yangi jang olganini xabar bergandi. Keyinroq bu malumotni Xabib Nurmagomedov ham tasdiqlab, qarindoshi markaziy jangda oktagonga chiqishini qo'shimcha qilgan edi. 

Ayni paytda 27 yoshli Umar Nurmagomedov UFC promoushenida 4 ta g'alabali seriya bilan kelyapti. So'nggi jangida reytingning 11-pog'onasida borayotgan Raoni Barselosni birinchi raundning o'zida mag'lubiyatga uchratgandi. 

31 yoshli Kori Sendxagen esa oxirgi ikkita jangida zafar quchgan. Avvaliga Song Yadongni texnik nokautga uchratgan, keyin esa Marlon Veradan ochkolar hisobiga ko'ra ustun kelgan. Undan avval esa Ti Jey Dillashou va Petr Yanga yutqazib qo'ygan edi.