UFC Vegas 63. Markaziy jangda texnik nokaut va oqshomning qolgan barcha natijalari bitta xabarda

UFC Vegas 63 oqshomining markaziy jangi amerikalik Kelvin Kattar hamda britaniyalik Arnold Allen o'rtasida o'tkazildi. Jang ikkinchi raundda Kattarning tizzasidan olgan jarohati sabab to'xtatildi. Kelvin birinchi raundda tizzasini jarohatlab olgan edi. Hakamlar texnik nokautli g'alabani Allenga taqdim etishdi.

Turnirning so-main event jangida UFC faxriysi Tim Mins faoliyatidagi ketma-ket ikkinchi mag'lubiyatini qabul qilib oldi. U uch raund yakunlariga ko'ra Maks Griffinga ochkolar hisobiga ko'ra imkoniyatni boy berib qo'ydi.

UFC Vegas 63 oqshomining qiziqarli janglaridan yana biri og'ir vazn toifasida o'tkazilib, unda belaruslik Andrey Orlovskiy braziliyalik Markos Rojerio de Limaga qarshi oktagonga ko'tarildi.

Jang birinchi raundning o'zidayoq yakuniga etdi. De Lima bo'g'ish usuli bilan tajribali raqibini mag'lubiyatga uchratdi. Bu Orlovskiyning faoliyatidagi 21-mag'lubiyat bo'ldi. Uning hisobida 30 ta g'alaba ham bor. O'z o'rnida de Lima MMAdagi 20-g'alabasini tantana qildi.

Gruziyalik o'rta vazn toifasi jangchisi Roman Dolidze birinchi raundning so'nggi daqiqasi o'tib borayotgan bir pallada amerikalik Fil Xousni nokautga uchratdi. 

SHuningdek, ushbu oqshomda Treshin Gor, Yun Yon Pak, Stiv Garsiya va Kristian Rodriges ham navbatdagi g'alabalarini qo'lga kiritishdi. Ularning bari raqiblarini muddatidan avval taslim etishgan.