Ular Rio Olimpiadasiga borishadi – Ranoxon Omonova

Ranoxon Omonova – xalqaro toifadagi sport ustasi, bir nechta xalqaro turnirlar g'olibi. 1994 yil 8 mart kuni Andijon shahrida dunyoga kelgan. Ilk murabbiyi Ravshan Omilov. Joriy yil u Qarshi Davlat universitetining jismoniy madaniyat fakultetini tamomlaydi.

Rio-2016 Olimpiadasi yo'llanmasini o'tgan yilning 2-3 noyabr kunlari Qatar poytaxti Doxa shahrida o'tkazilgan Gran-Pri turnirining 7-bosqichida qo'lga kiritgan. Vakilamiz 200 metr masofaga kompleks suzish bahslarida belgilangan meyorni bajarib, kuchli beshlikdan joy olgan edi.

Rano Omonova bu yilgi mavsumni ham yaxshi boshladi. U 21-25 yanvar kunlari oralig'ida Belgiyaning Antverpen shahrida o'tkazilgan xalqaro turnirning 400 metr masofaga kompleks usulda suzish musobaqasida marraga 4 daqiqayu 40.71 soniyada etib kelib, kumush medalga sazovor bo'ldi. Ayni paytda u olimpiya o'yinlari sovrindori Sergey Zabolotnov qo'li ostida mashg'ulot o'tkazyapti.

– SHu paytgacha 8 karra O'zbekiston chempioni bo'ldim. Medallarim soni 600dan oshdi. Braziliyadagi olimpiada men uchun faoliyatimdagi ikkinchi olimpiada bo'ladi. 2012 yili Londonda bo'lib o'tgan 30-Yozgi Olimpiya o'yinlarida yoshligim, keyin kuchli hayajon sabab ko'rsatkichlarim biroz pastroq bo'lib, 17-o'rindan joy egallagandim. Maqsadimi, Rio Olimpiadasida munosib tarzda ishtirok etishdir, - deydi Rano Omonova.