Ulug'bek, Diyora va Svetlananing harbiy unvonlari oshdi + FOTO

Marosimni mudofaa vaziri general-leytenant Bahodir Qurbonov so'z bilan ochib berdi. XXXIII yozgi olimpiya o'yinlarida mamlakatimiz terma jamoasi 8 ta oltin, 2 ta kumush va 3 ta bronza medali bilan umumjamoa hisobida 13-o'rinni egallagandi. Qurbonov o'z so'zida mudofaa vazirligi sportchilari ushbu nufuzli musobaqada 2 ta oltin va 1 ta kumush medalini qo'lga kiritganini etirof etdi. Bu sportchilar mudofaa vazirining tegishli buyrug'i bilan taqdirlanishdi. 

Xususan, -52 kg vazn toifasida dzyudo bo'yicha ayollar o'rtasida O'zbekiston tarixida ilk oltin medal sohibasi Mudofaa vazirligi Oliy sport natijalarini rivojlantirish markazi sportchisi, leytenant Diyora Keldiyorovaga muddatidan oldin navbatdagi "katta leytenant" harbiy unvoni topshirildi. SHuningdek, u "To'maris" ko'krak nishoni bilan ham taqdirlandi. 

-68 kg vazn toifasida taekvondo sporti bo'yicha O'zbekiston Respublikasi tarixida ilk ikki karra Olimpiada oltin medal sohibi, Mudofaa vazirligi Oliy sport natijalarini rivojlantirish markazi sportchisi kichik serjant Ulug'bek Rashitov boshlang'ich oficerlik "leytenant" harbiy unvoni bilan taqdirlandi. 

Taekvondo sporti bo'yicha ayollar o'rtasida o'zbekistonlik ilk kumush medal sohibasi, Mudofaa vazirligi Oliy sport natijalarini rivojlantirish markazi sport bo'limi sportchisi kichik serjant Svetlana Osipovaga ham boshlang'ich oficerlik "leytenant" harbiy unvoni topshirildi. Bundan tashqari, u ham "To'maris" ko'krak nishoni bilan ham taqdirlandi. 

Parij-2024 yozgi Olimpiya o'yinlariga tayyorgarlik ko'rishdagi faolligi hamda xamkorligi uchun Oliy sport natijalarini rivojlantirish markazi o'qituvchi treneri – Qurolli Kuchlar xizmatchisi Xan Pavel Afanasevich ikki xonali uy bilan; 

-57 kg vazn toifasida boks sporti bo'yicha ayollar o'rtasida o'tkazilgan musobaqalarda matonat va jasorat ko'rsatganligi uchun Mudofaa vazirligi Oliy sport natijalarini rivojlantirish markazi sport bo'limi sportchisi – oddiy askar Turdibekova Sitora SHavkat qizi "To'maris" ko'krak nishoni bilan taqdirlandi.

Mudofaa vazirligi Axborot va ommviy kommunikaciyalar departamenti