Ulug'bek Rashitov: "Yaponiyadagi gran-prida maksimal natija ko'rsatishga harakat qilaman"

Bu musobaqada shu yilning iyul oyida Iordaniya poytaxti Amman shahrida bo'lib o'tgan o'smirlar o'rtasidagi 10-Osiyo chempionatida oltin medalni qo'lga kiritgan Ulug'bek Rashitov ham ishtirok etadi. O'zbekiston taekvondo WTF associaciyasi matbuot xizmati 2002 yilda tug'ilgan sportchi bilan suhbatlashdi.  

- Taekvondoga kirib kelish qanday bo'lgan? 

- Yoshligimda Bryus Li ishtirokidagi filmlarni ko'p tomosha qilardim. 2008 yilda dadam meni taekvondoga berishga qaror qilgandi. SHu tariqa ushbu sport turi bilan shug'ullanishni boshladim. 

- Birinchi murabbiyingiz kim bo'lgan? 

- Mening birinchi murabbiyim Xan Pavel Afanasevich. U doim meni qo'llab-quvvatlab keladi. Yaxshi va yomon kunimda yonimda bo'lgan. Murabbiy sifatida juda ham qattiqqo'l.  

- Taekvondoning aynan nimasi sizga yoqadi? 

- Buni so'z bilan tariflab bera olmayman. Bu har kungi odatimga aylanib ulgurgan. 

- Kumiringiz kim? 

- Men o'zimga o'zim kumirman. 

- Siz asta sekin o'smirlar darajasidan kattalar darajasiga o'tayapsiz. Ular o'rtasida qanday fark bor? 

- O'smirlar o'rtasidagi musobaqalar nisbatan osonroq. Kattalar o'rtasidagi musobaqalarda esa raqiblar jismoniy jihatdan kuchliroq va anchayin tajribali. 

- Sentyabr oyida Yaponiyadagi Gran-prida ishtirok etasiz. Bu musobaqadan nima kutayapsiz? 

- Yaponiyadagi Gran-prida maksimal natija qayd etishga harakat qilaman.

O'zbekiston taekvondo WTF associaciyasi matbuot xizmati