“Umid nihollari -2018”. Qashqadaryoda g'oliblar taqdirlandi

Sport bayrami avvalida sanatkorlarning musiqiy dasturi namoyish etildi. Unda taniqli sanat ustalari  go'zal diyorimizni madh etuvchi kuy-qo'shiqlari bilansportchilar, murabbiylar va marosimga yig'ilgan keng jamoatchilikni hushnud etdi. Bir necha sport turlaridan ko'rgazmali chiqishlar sport bayramiga o'zgacha ko'rk-tarovat bag'ishladi. SHundan so'ng, g'oliblarni tantanali taqdirlash marosimi o'tkazildi.

Dastlab, musobaqaning uchinchi o'rin sohiblari bo'lgan CHiroqchi tumani jamoasi sahnaga taklif etildi. Ularga qimmatbaho esdalik sovg'asi - televizor hamda diplom va kubok taqdim etildi. Uni O'zbekiston Respublikasi Xalq talimi vazirining birinchi o'rinbosari Qodirjon Bekturdiev topshirdi.

Ikkinchi o'rinni egallagan SHaxrisabz tumani jamoasiga kompyuter jamlanmasi, diplom va kubokni O'zbekiston Milliy Olimpiya qo'mitasi Bosh kotibi Jasur Matchanov topshirdi. 

Nihoyat, birinchi o'rinni qo'lga kiritgan Koson tumani jamoasiga diplom, kubok va Prezident sovg'asi – “Damas” rusumli avtomobil tuhfa qilindi. Faxrli birinchi o'rin uchun ajratilgan sovg'ani Qashqadaryo viloyat hokimi Zafar Ro'ziev tantanali ravishda topshirdi va barcha sportchi-yoshlarni sport bayrami bilan qutladi.

SHu kuni oltin, kumush va bronza medallarini  qo'lga kiritgan jamoalar qalbida, yuz-ko'zida o'ziga xos g'urur, shijoat va iftixor tuyg'usi ufurib turgan bo'lsa, kuchli uchlikka erisha olmagan jamoalar ham mashg'ulotlarga zo'r berib, “Biz ham albatta, bunday yutuqlarga erishamiz”, deya maqsad qilgan bo'lsa ajab emas. Bunday ezgu-maqsadlar yoshlarimizda jismoniy tarbiya va sportga bo'lgan oshnoligi ko'payaveradi, ommaviylik oshib boraveradi.

- Bu yilgi bahslar o'ziga xos qizg'in tarzda tashkil etildi, - deydi Koson tumani BO'SM direktori Anvar Ergashev. – Final bosqichiga etib kelish oson kechmadi. O'tgan yili viloyat bosqichida g'oliblikni qo'lga kiritish uchun harakat qilgandik. Lekin ochkolarimiz etmagani boisi ikkinchi o'rinni band etgan edik. SHogirdlarimizning mashg'ulotlarga zo'r berishi natijasida ko'zlagan maqsadimizga erishib, faxrli birinchi o'rinni qo'lga kiritdik. Mazkur “Umid nihollari 2018” musobaqalarida g'olib bo'lgan o'quvchilarimiz yaqin kelajakda milliy terma jamoalarimizga munosib nomzod bo'lishi tayin. Terma jamoalar tarkibiga yangi iqtidorlarni etkazib berish va sportchilarimiz xalqaro sport maydonlarida muvaffaqiyatlarga erishishi orqali Yurtimiz bayrog'ini baland hilpirashi, madhiyamiz sadolari baralla yangrashi bosh maqsadlarimizdan sanaladi.  

“Umid nihollari-2018” yakuniga etdi. Biroq, eng quvonarlisi, kuchli uchlikdan joy olgan o'quvchilarimiz orasida milliy terma jamoalarimizga munosib nomzodlar bo'y ko'rsatdi. Bugun medallarga ega bo'lgan sportchi-o'quvchilarimiz yaqin kelajakda xalqaro musobaqalarning g'oliblariga aylanishi bor haqiqat. Zero, buning uchun bizda sharoit ham, imkoniyat ham etarli.

Ilhom RAHMONOV tayyorladi, o'z muxbirimiz