Urganch shahrida katta kurash bayrami davom etmoqda+FOTO

Millatimiz faxri va g'ururi bo'lgan kurash bugun jahon arenalarini zabt etmoqda. SHu yilning avgust oyida Indoneziyaning Jakarta shahrida o'tadigan Osiyo o'yinlarida milliy sportimiz bo'yicha ilk bor rasmiy musobaqalar o'tkaziladi. 

Ana shunday nufuzli turnir oldidan Xorazm viloyatida o'tayotgan mazkur bellashuvlar dunyoning 14 mamlakatidan kelgan polvonlar uchun muhim sinov vazifasini o'tab berayotgani shubhasiz. Ikkinchi kundirki, Urganch shahridagi “Yoshlik” sport majmuasi kurash muxlislari bilan to'lib toshmoqda. 

Xalqaro turnirning ochilish marosimida Xorazm viloyati hokimi vazifasini bajaruvchi Farhod Ermanov, O'zbekiston Kurash federaciyasi raisining birinchi o'rinbosari Komiljon Yusupov, Milliy Olimpiya qo'mitasi bosh kotibi Jasur Matchonovlar so'zga chiqib, milliy qadriyatimizning ajralmas bo'lagi bo'lgan kurashning xalqaro maydondagi obro'sini oshirishda bu kabi musobaqalarning ahamiyati yuqoriligini takidlab o'tdilar.  

Ochilish marosimida xorazmlik sanat ustalarining chiqishlari yig'ilganlarga yanada xush kayfiyat baxsh etdi. Pahlavon Mahmud xotirasiga bag'ishlangan O'zbekiston Prezidenti sovrini uchun kurash bo'yicha xalqaro turnirning birinchi kunida ayollar 52 va 78, erkaklar esa 66 va 81 kg vazn toifalarida g'oliblik uchun gilamga chiqdilar.

Takidlash kerak, mazkur turnir doirasida O'zbekiston kurash federaciyasining navbatdan tashqari hisobot-saylov konferenciyasi bo'lib o'tdi. Unda tashkilot faoliyati tahlil etilib, Osiyo o'yinlari oldidan terma jamoalar faoliyatini yanada takomillashtirish borasida fikrlar almashildi. 

SHuningdek, federaciyaning yangi raisi saylanib, amalga oshirilishi lozim bo'lgan ishlar belgilab olindi. Musobaqa davom etmoqda. Turnir g'olib va sovrindorlari birozdan so'ng aniq bo'ladi.