Urganchda “Hokim va yoshlar uchrashuvi” chog'ida sportchilarga sovg'alar ulashildi

Prezidentimiz ilgari surgan 5 ta muhim va ahamiyatli tashabbus doirasida Xorazm viloyatining Urganch tumanidagi G'aybu sanoat kasb-hunar kollejida viloyat hokimligi, viloyat jismoniy tarbiya va sport, madaniyat, xalq talimi boshqarmalari, xotin-qizlar qo'mitasi, yoshlar ittifoqi viloyat Kengashi va boshqa tegishli tashkilotlar hamkorligida yoshlarni bugungi kundagi mavjud muammolari, fikr-mulohazalarini o'rganish, ularni ijobiy hal qilish maqsadida “Hokim va yoshlar uchrashuvi” tashkil etildi.

Uchrashuv chog'ida viloyat hokimi F.Ermanov tuman yoshlarining madaniyat, sport, sanat, axborot texnologiyalari hamda kitob o'qishga qiziqishini oshirish yuzasidan olib borilayotgan ishlar, bu borada yaratilgan shart-sharoitlar bilan tanishib, ular bilan suhbatlashdi.  

- Vohamizning shahar va tumanlarida o'tkazilayotgan uchrashuvlar foydadan holi bo'lmayapti, - deydi Xorazm viloyati jismoniy tarbiya va sport boshqarmasi boshlig'i SH.Madaminov. - Binobarin, Davlatimiz rahbari tomonidan ilgari surilgan tashabbuslarni hayotga tadbiq etish yo'lida uyushtirilayotgan bunday tadbirlar o'g'il-qizlarning intilish va tashabbuslarini qo'llab-quvvatlash, ularning istedod va qobiliyatini to'la namoyon etishlari uchun imkoniyatlar yaratib berish masalalari ijobiy hal qilinayotir. Tabiiyki, bu sportchi yoshlarimizni ham izlanishlar, yangi yutuqlar sari talpintirmoqda. 

“Hokim va yoshlar uchrashuvi”ning ahamiyatli jihati yana shunda bo'ldiki, unda Urganch tumanida voyaga etgan sportchilarning muvaffaqiyatlari, jumladan, ayni paytda “Tokio-2020” Olimpiadasi yo'llanmasi uchun ochkolar jamg'arayotgan dzyudochi Alisher Yusupov va pnevmatik miltiqdan o'q otish ustasi Olima Komilovaning faoliyati haqida ham atroflicha so'z yuritildi. 

Tadbirda viloyat hokimi tuman yoshlariga beshta yo'nalish bo'yicha sovg'alar topshirdi. Ular orasida gimnastika, tennis, shaxmat-shashka va boshqa ko'plab sport turlarining anjomlari bor edi.

Ikrom XUDOYBERGANOV, Urganch