UWW 2022 yilgi xalqaro musobaqalar taqvimni tasdiqladi

Unga ko'ra, 4-7 fevral kunlari Italiya poytaxti Rim shahrida o'tkazilishi rejalashtirilgan "Matteo Pellikone" reyting turniri koronavirusning "omikron" shtami sabab boshqa muddatga ko'chirildi. Endi ushbu turnir 22-25 iyun kunlari o'tkaziladi va yilning uchinchi reyting musobaqasiga aylanadi. Italiya hukumati keng tarqalayotgan "omikron" sabab turnirni belgilangan muddatda o'tkazmaslikka qaror qilgan. 

Bu yilgi mavsumning birinchi reyting turniri esa 24-27 fevral kunlari Turkiyaning Istanbul shahrida tashkil etiladi. Ushbu "Yashar Dogu" musobaqasida erkin va yunon-rum kurashi bo'yicha O'zbekiston terma jamoalari ham qatnashadi. 

Yilning ikkinchi reyting turniri 2-5 iyun kunlari Qozog'istonning Almati shahrida o'tkazilishi rejalashtirilgan. Reyting seriyasiga kiruvchi xalqaro turnirlarni 14-17 iyul kunlari Tunis turniri yakunlab beradi. 

Takidlash joiz, reyting ochkolarni hisoblash tizimida ham kichik o'zgarishlar kuzatildi. Ballar odatdagidek Olimpiada, jahon va qitaviy chempionatlar, reyting turnirlaridagi ishtirok uchun taqdim etiladi. Yangi o'zgarish bo'yicha endi barcha turnirlar emas, aksincha kurashchilarning yil davomida o'tkaziladigan turnirlardagi eng yaxshi to'rtta natija ochkolari hisoblanadi. 

SHuningdek, endi qura jarayonida avvalgidek to'rt nafar emas, reytingi yuqori sakkiz kurashchi turnir setkasi etakchilari sifatida qo'yiladi. Yil yakunida reyting ochkolari hisoblanib, har bir vazn toifasining eng yaxshilari elon qilinadi va pul mukofoti taqdim etiladi.