UWW onlayn-konferenciya o'tkazdi, unda Jahon chempionati masalasi ko'rildi

Unda asosan yil so'nggiga qadar jahon chempionati va boshqa musobaqalarni o'tkazish imkoniyatlari muhokama qilindi. Tokio Olimpiadasining 2021 yilga qoldirilishi natijasida dunyo sport kurashlari ommasida tabiiy savol tug'ildi: nima uchun shu yilning o'zida jahon chempionatini o'tkazish mumkin emas? 

Videoonlayn-konferenciyada UWW rahbariyati ayni mana shu savolni ko'rib chiqdi. Konferenciyaga UWW prezidenti Nenad Lalovich boshchilik qildi. Jahon chempionati masalasi muhokamaga qo'yildi. Lekin hammaning fikri ham bir joydan chiqmadi. 

Masalan, Rossiya sport kurashlari Federaciyasi prezidenti Mixail Mamiashvili yil so'nggiga qadar jahon chempionatini o'tkazish tarafdori bo'ldi. Ammo, Mamiashvilining fikri boshqalar tomonidan qo'llab-quvvatlanmadi. Uning so'zlariga ayniqsa Eron federaciyasi vakili Aliakbar Dodange jiddiy tarzda qarshi chiqdi. U jumladan, shunday dedi: 

"Ayni paytda bizning klublarimiz yopilgan. Hech kim ularning qachon ochilishini ham ayta olmaydi. Vaholanki, o'quv-mashg'ulot yig'inlari, jahon chempionatiga ichki saralash musobaqasini o'tkazish kerak. Ertami, kech, bizga shug'ullanish uchun ruxsat berishadi. Lekin biz jahon chempionatiga tayyorlana olamizmi?"

Eronlik mutaxassisni AQSH sport kurashlari Federaciyasi ijrochi direktori Rich Bender ham qo'llab-quvvatladi. Dunyoning ikki elit kurash davlati qarshi chiqayotgan ekan, jahon chempionatining bu yil o'tkazilishiga umid bog'lamasa ham bo'ladi.  

Onlayn konferenciya yakunida UWW prezidenti bu yil xalqaro musobaqalarni o'tkaza olsak, shuning o'zi kurash olami uchun katta muvaffaqiyat bo'lishi aytdi. Xalqaro sog'liqni saqlash tashkiloti bergan xabar ko'ra dunyoda pandemiya bilan bog'liq vaziyat umumiy ko'rinishda yomonlashib bormoqda. Evropa sekin-asta karantindan chiqayotgan bo'lsa, Janubiy Amerika va Osiyoda vaziyat o'zining eng cho'qqisiga chiqqan.