UWWning belbog'li kurash turlari bo'yicha qo'mita raisi MOQda mehmon bo'ldi

Martabali mehmonni MOQ Bosh kotibi Jasur Matchanov kutib oldi. 

"Kurash bizning milliy sportimiz hisoblanadi. Yurtimizda sportning ushbu turi juda ham rivojlangan. Milliy olimpiya qo'mitasi noolimpiya sport turlari bilan yaqindan hamkorlikni yo'lga qo'ygan. Qolgan sport turlari qatorida belbog'li kurashni ham rivojlantirishda davom etamiz", - dedi Jasur Matchanov.

O'z o'rnida litvalik mutaxassis yana bir bor O'zbekistonga kelganidan xursand ekanligini yashirib o'tirmadi. Gentautas Vileyta kurashning yurtimizda ommaviy ekanligiga alohida urg'u berdi.

"Albatta Olimpiya sport turlarida medal qo'lga kiritish juda yaxshi. Ammo, o'zbek xalqi kurashga juda qiziqadi. Bu erda ko'plab musobaqalar tashkil qilganmiz. Unda ko'plab muxlislar tomoshaga tashrif buyurishadi. Bellashuvlar haqiqiy ajiotajni yuzaga keltiradi", - dedi mehmon.

Undan tashqari Gentautas Vileyta belbog'li kurash ko'plab mamlakatlarda rivojlanayotgani, jumladan, Eronda Navro'z bayramiga bag'ishlab o'tkaziladigan musobaqada 3000dan ziyod sportchi ishtirok etishi, tomosha qilish uchun esa 100 mingdan ortiq muxlislar kelishi haqida gapirib o'tdi. Dunyo bo'yicha 200dan ortiq milliy kurash turlari mavjud ekanligi, ularni rivojlantirishda xalqaro dzyudo federaciyasi bilan yaqindan hamkorlik qilib kelinayotgani ham mehmon tomonidan qayd etib o'tildi. 

Bunga javoban MOQ Bosh kotibi Jasur Matchanov ham dyudoga kurash, belbog'li kurash sportchilarini jalb etish tizimi O'zbekistonda ham yo'lga qo'yilayotganini alohida takidladi. Gentautas Vileyta uchrashuv davomida belbog'li kurash 2024 yilgi Olimpiya o'yinlari dasturiga kiritilishi mumkinligi haqida ham gapirdi.

“Olimpiya yo'nalishidagi yakkakurash sport turlari bilan bir necha million odam shug'ullansa, milliy yakkakurash turlari bilan dunyoda milliardlab odamlar shug'ullanishadi. Xitoy, Hindiston, Pokiston kabi mamlakatlarning ham o'z milliy yakkakurash sport turlari bor. 2024 yilda Parijda o'tkaziladigan Olimpiya o'yinlarida belbog'li kurashning ayollar o'rtasidagi bahslari o'yinlar dasturiga kirishi ehtimoli yuqori. Buning uchun barcha talablar, meyoriy hujjatlar bizda tayyor. U katta ehtimol bilan yunon-rum kurashidagi ayollar o'rtasidagi bahslarning o'rnini egallaydi. 

Jakartada Osiyo o'yinlari oldidan ko'rgazmali chiqishlar bo'ladi. Undan so'ng esa turnir tashkil etiladi. O'sha musobaqada o'zbekistonlik sportchilarni ko'rishdan xursand bo'lamiz” – dedi so'zining yakunida UWW mutaxassisi.  

O'z o'rnida Jasur Matchanov O'zbekiston Milliy olimpiya qo'mitasi tashkilot bilan hamkorlik qilishga tayyor ekanligini aytib o'tdi. "Belbog'li kurashga munosabatimiz ijobiy. Yaqindan hamkorlik qilishga tayyormiz. Bu boradagi takliflarni albatta izchil o'rganib chiqamiz", - dedi MOQ Bosh kotibi.

Uchrashuv yakunida ananaga muvofiq mehmonga Milliy olimpiya qo'mitasining maxsus sovg'asi topshirildi. Gentautas Vileyta ham qabul uchun minnatdorchilik bildirgan holda Jasur Matchanovga belbog'li kurashga atab nashr qilingan enciklopediyani taqdim etdi.