Valter Uoker akasi Jonni Uokerga "vyzov" tashladi

Valter kecha ikki oyog'i yo'q Zayon Klarkni g'alati greppling bahsida mag'lub etganidan so'ng, Mayamidagi Karate Combat turnirida o'zini qo'llab-quvvatlashdan bosh tortgan akasi Jonni Uokerga qarshi jang qilmoqchi. 

"Men juda xafa bo'ldim, chunki akamni men bilan bu erga kelishga chaqirgandim, u esa kelmadi. Qarang, Jonni bu erda yo'q. Uni majaqlab tashlamoqchiman! Hozir akam bilan munosabatlarimiz g'alati.

Men uni tugatmoqchiman, oyog'ini sindirmoqchiman. Jonnini bu erga olib kelib, haqiqiy Uoker kimligini ko'rsatmoqchiman. Xotinidan ruxsat so'rashi kerakligini hamma biladi. Xotini ruxsat bersa - urishamiz. Menga baribir. Qaerdaligining ahamiyati yo'q.

Menga pulni ko'rsating, hammasini yo'q qilaman. Bu faqat boshlanishi. Uni bu erda ham, UFC’da ham mag'lub etaman. Men endi boshlayapman. Og'ir vaznga o't, kichkintoy! Men senga haqiqiy og'ir vaznli kimligini ko'rsataman", - dedi Uoker tadbirdan keyin bergan intervyusida.

Ayni damda aka-ukalarning janglari belgilangan. Jonni Uoker 11 aprel kuni Mayamida bo'lib o'tadigan UFC 327 turnirida Dominik Reyesga qarshi oktagonga ko'tarilsa, Valter Uoker 28 mart kuni Sietldagi turnirda Marchin Tibura bilan hisob-kitob qiladi.