Vazir Xorazm viloyatida o'rganish ishlarini olib bordi

O'zbekiston Respublikasi Sportni rivojlantirishi vaziri Adham Ikramov boshchiligida tuzilgan ishchi guruh ham hududlarda sportni rivojlantirish borasida amalga oshirilayotgan ishlar bilan tanishishda davom etmoqda.

Jumladan, Andijon, Farg'ona, Namangan, Jizzax va Sirdaryo viloyatlariga xizmat safarlari tashkil etilib, hududlarda sportni rivojlantirish borasida erishilayotgan yutuqlar va sohadagi kamchiliklar tahlil qilingan edi.

Vazir boshchiligidagi ishchi guruh Xorazm viloyatida xizmat safarida bo'lib turibdi. O'rganishlar davomida tumanlardagi sport maktablari faoliyati bilan tanishilmoqda hamda joriy yil 23 may kuni O'zbekiston Respublikasi Prezidenti SHavkat Mirziyoev raisligida sport talimini yaxshilash, iqtidorli sportchilarni saralash va ularning zaxirasini yaratish, murabbiylarni tayyorlashdagi ustuvor vazifalar yuzasidan o'tkazilgan videoselektor yig'ilishida berilgan topshiriqlar bo'yicha tushuntirishlar olib borilmoqda.

SHu bilan birga, Urganch Olimpiya va paralimpiya zaxiralari kollejiga tashrif davomida kollejda tahsil olayotgan yosh sportchilar bilan muloqot tashkil etildi. Suhbat davomida yosh atletlar tomonidan berilgan takliflar va tashabbuslaridan kelib chiqib, masullarga tegishli ko'rsatmalar berildi.

SHuningdek, Xorazm viloyati sportni rivojlantirish boshqarmasi masullari hamda BO'SM va IBO'SM direktorlarining hisobotlari tinglandi.