Vazirlik va idoralarning xotin-qiz xodimlari 6 ta sport turi bo'yicha bahslashdi

Mamlakatimizda sportning ayollarga xos nozik va nafis turlarini rivojlantirish, sport bilan shug'ullanishni aholining kundalik hayot tarziga aylantirish va shu orqali ayollar salomatligini saqlash borasida ko'plab ishlar amalga oshirilmoqda.

Bugun Toshkent davlat moliya instituti sport majmuasida “Sport – nafislik va salomatlik manbai” shiori ostida vazirliklar, korxona va tashkilotlarda faoliyat ko'rsatayotgan ayollar o'rtasida suzish, shaxmat, stol tennisi, badminton, engil atletika va gimnastrada turlari bo'yicha musobaqalar bo'lib o'tdi.

Mazkur sport bayrami Toshkent shahar jismoniy tarbiya va sport boshqarmasi hamda qator hamkor tashkilotlar bilan birgalikda yuqori saviyada tashkil etildi.

Malumot o'rnida takidlash lozim, hozir mamlakatimizda 3 ming 162 nafar ayol murabbiy qizlarimizni sport bilan shug'ullantirib kelishmoqda. O'zbekistonda o'qishdan va ishdan tashqari vaqtda jismoniy tarbiya va sport bilan shug'ullanuvchi xotin-qizlar 1 million 50 ming 150 nafarni tashkil etadi, shulardan 514 ming 936 nafari esa qishloq joylarda istiqomat qiladigan yurtdoshlarimizdir.

Jismoniy tarbiya va sport bilan shug'ullanayotgan xotin-qizlardan 810 ming 863 nafari umumtalim maktablarida, 10 ming 485 nafari akademik liceylarda, 105 ming 805 nafari kasb-hunar kollejlarida, 11 ming 557 nafari oliy talim muassasalarida, 6 ming 287 nafari mehnat jamoalarida hamda 105 ming 153 nafari boshqa muassasalarda faoliyat olib bormoqda.

Sport bayramida 6 ta sport turi bo'yicha jami 24 ta jamoa 12 nafardan ishtirokchi bilan qatnashdi. Tadbir yakunida barcha ishtirokchi jamoalar tashkilotchilar tomonidan maxsus nominaciyalar bo'yicha rag'batlantirildi.