Viloyatlardagi dzyudoning bugungi kuni muhokama qilindi

ZOOM platformasida o'tgan yig'ilishni O'zbekiston dzyudo federaciyasi rais o'rinbosari SHoatxam Isroilov olib bordi. Unda karantindan keyingi dzyudochilarimizning holati, amalga oshirilayotgan ishlar, federaciyaning viloyat bo'limlaridagi mavjud kamchiliklari, echimini kutayotgan muammolar atroflicha muhokama qilindi.

Birinchi ko'rilgan masala - shu yil so'nggiga qadar yoshlar (2000-2002 yillarda tug'ilganlar) va kattalar o'rtasidagi O'zbekiston chempionatini o'tkazish bo'ldi. Vaqt tig'izligi sabab federaciya tomonidan har ikki musobaqani o'tkazish uchun oktyabr oyi taklif etildi. Lekin aksariyat viloyatlarda karantin choralari kuchaytirilgani bois dzyudochilar mart oyidan beri mashg'ulot o'tkazishmadi. Ular uy sharoitida yakka tartibdagi mashg'ulotlar bilan cheklanishdi. Ayrim olimpiya zaxiralari kollejlari koronavirus pandemiyasi sabab kasalxonalarga aylantirildi. Viloyat murabbiylari shu tufayli O'zbekiston chempionatini oktyabrda emas, noyabr oyining so'nggi o'n kunligida o'tkazish taklifini berishdi. Bunga qo'shimcha tarzda musobaqa dasturiga o'g'il bolalar o'rtasida -55, qizlarda esa -44 kg vazn toifasini kiritishni so'rashdi. SHuningdek, murabbiylar yil so'nggiga qadar o'smirlar (2005-2006) o'rtasida ham mamlakat birinchiligini o'tkazish taklifi bilan chiqishdi.

Ikkinchi masala bu - kvotalar. Murabbiylar o'z viloyatlaridan necha nafar dzyudochi imtiyozli yo'llanma asosida universitetlarga qabul qilingani haqida malumot taqdim etishdi. Xususan, Andijon viloyatidan 9 (7 qiz, 2 o'g'il bola), Farg'onadan 4 (3 qiz, 1 o'g'il bola) Samarqanddan 17 (5 qiz, 12 o'g'il bola), Qashqadaryodan 12 (1 qiz, 11 o'g'il bola), Navoiydan 5 (1 qiz, 4 o'g'il bola) nafar dzyudochi imtiyozli yo'llanma asosida talabalik baxtiga muyassar bo'lgan.  

Uchinchi masala - dzyudochilarning karantindan keyingi holati hamda viloyatlardagi mavjud muammolar. Yuqorida takidlanganidek, aksariyat viloyatlarda hamon umumiy mashg'ulotlar boshlanmagan. Karantin qoidalari biroz yumshatilganidan keyin birin-ketin jamoalar sport zallariga qaytishyapti. Samarqandda 1 oktyabrdan mashg'ulotlar boshlanishi aytildi. O'z o'rnida Navoiyda dzyudo bilan shug'ullanish uchun sport zali yo'qligi malum qilindi. Ayrim viloyatlarning Olimpiya zaxiralari kollejlarida dzyudo bo'limi uchun qabul kvotalari sonining kamligi alohida urg'ulandi. 

To'rtinchi masala - viloyatlardagi avvaldan belgilab berilgan maktablar qoshida tashkil etilgan IJF maktablari. Bu maktablarning aksariyatida hali mashg'ulot boshlanmagan. SHunday bo'lsa-da, ish to'xtab qolgani yo'q. Xatto bu maktab tarbiyalanuvchilari imtiyozli ravishda institutga ham qabul qilinishdi. Bugungi kunda Samarqandda Farmon Qobilov, Andijon viloyatining Jalaquduq tumanida SHokir Ortiqov, Marhamatda Xolmuhammad Sotvoldiev, Bo'zda Ixtiyor Abduqahhorov kabi murabbiylar bolalar bilan shug'ullanishyapti.   

Taqdim etilgan malumotga ko'ra yildan-yilga viloyatlarda dzyudo bilan shug'ullanayotganlar soni oshib bormoqda. Masalan, Farg'ona viloyatida o'tgan yili 1200 bola muntazam dzyudo bilan shug'ullangan bo'lsa, joriy yilda ular soni 1700 nafardan oshdi. Andijon viloyatida o'tgan yili 700, bu yil esa bu son 900 nafardan oshgan. Ulardan 147 nafarini qizlar tashkil etadi. Agar pandemik vaziyatga duch kelmaganimizda, shug'ullanuvchilar soni yana ham ko'proq bo'lardi. 

Yig'ilish so'nggida taklif etilgan masalalar qisqa fursatda ko'rib chiqilishi, mavjud muammolar bartaraf etilishi takidlandi. Yil so'nggiga qadar o'tkaziladigan O'zbekiston chempionatlari haqida tez orada malumot taqdim etilishi aytildi.