Viloyatlardagi sport federaciyalar faoliyati qayta ko'rib chiqiladi

Uchrashuvda shuningdek, Milliy olimpiya qo'mitasi Bosh kotibi Jasur Matchanov, Jismoniy tarbiya va sport vazirligi boshqarma boshlig'i Nazirjon Xudoyqulovlar ham ishtirok etishdi. 

"Qilayotgan ishlarimizni bir tizimga solib olmagunimizcha, bunday yig'ilishlar hali ko'p tashkil etiladi. Jismoniy tarbiya va sport vazirligi bilan hamkorlikda katta ishlarni boshlaganmiz. O'z oldimizga katta rejalar qo'yganmiz. Oldimizdagi asosiy vazifalardan biri viloyatlarimizdagi sport federaciyalari bo'limlari ishini tartibga solib olishdir", - dedi MOQ Bosh kotibi.

Yig'ilishda Osiyo o'yinlariga ishlab chiqilgan strategiya hususida federaciya mutasaddilariga tushuntirish berildi. Unga ko'ra, yakkakurash sport turlarida MOQ sovrini uchun o'tkazilayotgan musobaqalarda yuqori o'rinlarni egallagan to'rt nafar sportchi bilan alohida ishlanadi. Ularning biri terma jamoaning asosiy azosi, qolganlar esa unga zaxira vazifasini bajaradi. Ular qatiy tartib asosida o'quv-mashg'ulotlar bazasida Jakartadagi Osiyo o'yinlariga tayyorgarlik ko'radilar. 

Mutaxassislar bilan birga ularning tayyorgarlik rejasi ishlab chiqiladi. O'sha sportchilarning uyqudan uyg'onishdan tortib mashg'ulotlarigacha, ovqatlanishdan tortib dam olish vaqtigacha qatiy belgilab beriladi. Osiyo o'yinlarigacha shunday tartibda ishlanadi. Keyin esa Olimpiya o'yinlari uchun yangi strategiya ishlanadi. 

MOQ Bosh kotibi yakkakurash sport turlarida viloyat terma jamoalari o'rtasida MOQ sovrini uchun maxsus musobaqa tashkil qilinishi haqida ham aytib o'tdi. 

"Yakkakurash sport turlari bo'yicha har bir viloyatning o'z terma jamoasi shakllantiriladi. Ular o'rtasida Milliy olimpiya qo'mitasi sovrini uchun katta musobaqa bo'lib o'tadi. U haqiqiy shou ko'rinishida bo'ladi. Birinchi o'rinni qo'lga kiritgan jamoa yaxshigina mukofotlanadi. Bungacha faqat birinchi va ikkinchi raqamli sportchilarga etibor qaratilgan. Uchinchi va to'rtinchi raqamli sportchilar etibordan chetda qolib ketgan. Biz ularga ham imkoniyat bermoqchimiz. Tajriba shuni ko'rsatmoqdaki, to'rtinchi raqamli sportchi terma jamoaning birinchi raqamli azosini ham yutib qo'yishi mumkin. SHu sababdan ham ular o'rtasidagi raqobatni yo'lga qo'yamiz", - dedi Matchanov.