Xorazm viloyatida Sport haftaligi boshlandi

Mazkur haftalik doirasida barcha hududlarda ommaviy badantarbiya mashqlari, «Sog'lom hayot uchun 5000 qadam» loyihasi, «Milliy sport o'yinlari festivali», «Hokim kubogi» musobaqalari, velomarafonlar, «Xotin-qizlar spartakiadasi» kabi 40dan ortiq ommaviy sport tadbirlari tashkil qilish rejalashtirilgan.

Sport haftaligi doirasidagi ilk ommaviy tadbirlar Xiva shahrida start oldi. Unda qadim va navqiron Xiva shahridagi tashkilot va muassasalar xodimlari va keng jamoatchilik ishtirokida ertalabki badantarbiya mashqlari hamda «Sog'lom hayot uchun 5000 qadam» loyihalari tashkil qilindi. Kun davomida sportning o'yin turlari bo'yicha «Hokim kubogi» musobaqalari ham tashkil etildi.

Haftalik doirasida Gurlan va Xonqa tumanlarida mahalla yoshlari hamda tashkilot muassasalarining xodimlari ishtirokida mini-futbol bo'yicha «Hokim kubogi» musobaqalari tashkil qilindi. Unda 200 nafardan ortiq o'smir-yoshlar va tashkilot xodimlari g'oliblik uchun o'zaro bahs olib bordi. Musobaqaning g'olib va sovrindorlari tuman hokimligining diplom, medal, esdalik sovg'alari va kubok bilan taqdirlandi.

Xulosa qilib aytganda, bu kabi ommaviy sport tadbirlari aholi orasida sog'lom turmush tarzini keng targ'ib qilish va aholi salomatligini yanada mustahkamlashga xizmat qiladi.