Xorazmda velosport bo'yicha Hokim kubogi musobaqasi yo'lga qo'yiladi

O'zbekiston velosiped sporti federaciyasi rahbariyati Xorazm viloyatiga qilgan tashrifi davomida hududda ushbu sport targ'ibotini yanada oshirish masalalari bo'yicha istiqbolli rejalarni muhokama qildi.

Xorazm viloyati hokimiyati mutasaddilari ishtirokida kechgan yig'ilishda O'zbekiston velosiped sporti federaciyasi bosh kotibi Kozim O'rinboyxo'jaev, federaciya maslahatchisi Farruh Xudoyqulov, viloyat Jismoniy tarbiya va sport boshqarmasi boshlig'i Nodira Jumaniyozova va boshqa bir qator soha mutasaddilari ishtirok etdi. Yig'ilish davomida federaciyaning viloyatdagi bo'limi uchun rahbar va ijrochi direktor saylandi. Unga ko'ra, Xorazm viloyat hokimining birinchi o'rinbosari Qudrat Igamberdiev federaciyaning viloyat bo'limi raisi, viloyat transport boshqarmasi boshlig'i Rahmatjon Boboev va Anvarjon Rahmonov uning o'rinbosari, Amonboy Jumanov esa Ijrochi direktor etib saylandi.

Safar davomida Xorazm viloyati hokimi Farhod Ermanov bilan uchrashuv bo'lib o'tdi. Unda viloyat hokimi Xorazmda velosport rivojiga hissa qo'shishdan minnatdor ekanligini, buning uchun barcha sharoitlarni yaratib berishga tayyorligini bildirdi. Suhbatda bir qator istiqbolli reja va dasturlar belgilab olindi. 

Unga ko'ra, endilikda viloyat federaciya bo'limi hokimlik tomonidan “Damas” avtomobili bilan taminlanadi. Avgust oyida viloyatda “Save aral” xalqaro velomarafon o'tkazilishi ham muhokama qilindi. Qolaversa, Farhod Ermanov tomonidan mahalla-tuman-viloyat bosqichida velosport bo'yicha “Hokim kubogi” musobaqalarini tashkil etish tashabbusi bir ovozdan maqullandi. 

SHubhasiz, bunday musobaqalar Respublikada sport ommaviyligini oshirish, terma jamoa uchun munosib zaxira sportchilarini saralash yo'lida katta qadam bo'ladi.