Xushxabar! Vyacheslav Pereteyko Parij-2024 Olimpiadasida hakamlik qiladi

Hujjatda aytilishicha, xalqaro toifadagi referi Vyacheslav Pereteyko Parij-2024 Olimpiadasining dzyudo bahslarini boshqarib boruvchi hakamlar ro'yxatiga rasman kiritilgan. 

Takidlash joiz, Vyacheslav Pereteyko IJF bayrog'i ostida o'tkazib kelinayotgan musobaqalarda hakamlik qilib, o'zini ijobiy tomondan namoyon eta oldi. Bu esa o'z o'rnida uning hakamlikdagi eng oliy orzusini ro'yobga chiqardi.  

"Qadrli Vyacheslav Pereteyko! Biz sizni olimpiya o'yinlarida hakamlik qiladigan referilar safidan joy olganingiz bilan tabriklaymiz. Siz bunga o'z mehnatingiz hamda IJF bayrog'i ostida o'tkazilayotgan turnirlardagi muvaffaqiyatli hakamligingiz orqali erishdingiz. Sizga bo'lajak Olimpiadada ham omad tilaymiz", deyiladi Armen Bagdasarov, Ki-Yong Jeon va Daniel Laskau imzolagan maktubda.    

MA'LUMOT UCHUN:

Vyacheslav Pereteyko - 1981 yil 19 yanvarda Toshkent shahrida dunyoga kelgan. Sportchilik faoliyati davomida asosan -90 kg vazn toifasidagi bellashuvlarda yurtimiz sport sharafini himoya qilgan. Afina-2004 Olimpiadasi ishtirokchisi, Osiyo chempionatlarining kumush va bronza, Osiyo o'yinlarining bronza medali sovrindori bo'lgan. 2020 yilgi Tokio Paralimpiya o'yinlarida hakamlik qilgan. 

Fursatdan foydalanib, O'zbekiston dzyudo federaciyasi Vyacheslav Pereteykoni ushbu muvaffaqiyat bilan muborakbod etadi. Tokio-2020 Olimpiadasida Ramziddin Saidov dzyudo bellashuvlarida hakamlik qilgan edi.