Yan va CHimaev UFC White House turniri ishtirokchilari bo'lishi aytildi

Avvalroq AQSH prezidenti Donald Tramp sakkiz yoki to'qqizta titul jangi bo'lishi mumkinligini aytgan edi.

Turnir Vashingtondagi Oq uy maydonida o'tkazilib, MMA tarixidagi eng ramziy voqealardan biriga aylanishi kerak. UFC rahbari Dana Uayt kard juda yulduzli bo'lishini aytgan, ammo jangchilarning aniq ro'yxati fevral oyida shakllantiriladi.

"Sakkizta titul jangi juda idealistik va o'ta shijoatli g'oya, lekin menimcha, biz olti yoki ettita to'liq chempionlik jangi bo'ladigan yo'nalishga qarab ketyapmiz. 1 fevralga qadar UFC 324 va UFC 325 o'tib bo'ladi. Barcha chempionlar bo'sh bo'ladi. Fevralda raqamli turnirlar yo'q, mart boshida esa BMF kamari uchun jang bo'ladi — u haqiqiy titul hisoblanmaydi. Keyin aprel yoki mayda raqamli iventlar, undan so'ng 14 iyun — ko'plab chempionlar tayyor bo'ladi.

Og'ir vazndagi chempionlik jangi Tom Aspinall — Siril Gan o'rtasida Oq uy maydonida o'tkaziladi, deb o'ylayman. Joshua Van — Tacuro Tayra jangi yilning birinchi yoki ikkinchi choragida bo'lishi mumkin. Xamzat CHimaev esa, ehtimol, aynan Oq uyda jang qiladi. Aleks Pereyrani nima uchun erta hisobdan chiqaryapsiz? Uning o'zi Oq uyni kutmoqchi ekanini aytgan. Merab Dvalishvili va Pyotr Yan ehtimol o'z trilogiyasini shu erda yakunlaydi", — dedi Anik.