Yashil hududlarda Yoshlar kubogi musobaqalari bo'lib o'tmoqda

Jismoniy tarbiya va sport vazirining tegishli buyrug'iga ko'ra bugun yurtimizning «yashil» hududlarida «Yoshlar oyligi» doirasida sportning stol tennisi, mini futbol, voleybol, badminton turlari bo'yicha Qoraqalpog'iston Respublikasi Jismoniy tarbiya va sport vazirligi hamda viloyatlar jismoniy tarbiya va sport boshqarmalari tomonidan yoshlar o'rtasida ommaviy sport musobaqalari o'tkazilmoqda.

Jumladan, mazkur buyruqning ijrosini taminlash maqsadida Sirdaryo viloyati Jismoniy tarbiya va sport boshqarmasi tomonidan «yashil» hududda joylashgan Yangier shahar bolalar-o'smirlar sport maktabi hamda viloyat futbol mahorat maktabi sport inshootlarida «Yoshlar kubogi» musobaqalari tashkil etildi.

Mazkur sport tadbiri karantin qoidalariga asosan ochiq sport maydonlarida ijtimoiy masofani saqlagan holda tashrif buyuruvchilarning sonini cheklash shartlari asosida o'tkazildi. «Yoshlar kubogi» musobaqalariga 100 nafardan ortiq yoshlar qamrab olindi. Musobaqalar yakunida g'olib va sovrindorlar tashkilotchilar tomonidan esdalik sovg'alari bilan taqdirlanishdi.