Францияга аталган Анталия "Катта Дубулға" турнири якунланди

Мукофот жамғармаси 154 000 еврони ташкил этувчи мусобақада бу йил учун рекорд - 83 давлатдан 600 нафар дзюдочи медаллар ҳамда Париж Олимпиадаси йўлидаги қимматли рейтинг очколари учун баҳс олиб борди. Якунда Франция терма жамоаси 5 та олтин, 2 та бронза медали билан умумжамоа ҳисобида биринчи ўринни эгаллади. 

Нидерландия 2 та олтин ва 1 та кумуш медаль билан иккинчи ўринни эгаллаган бўлса, бразилиялик дзюдочилар 2 та олтин ва 2 та бронза медали билан кучли учликка якун ясашди. Япония, Туркия, Бельгия, Австрия ва Италия терма жамоалари бир нафардан чемпионга эга бўлишди. Жами 28 давлат делегацияларининг камида 1 та бронза медалини қўлга киритгани дзюдо спорт турининг дунё бўйлаб ривожланиб бораётганини тасдиқлади. 

Ортга медаль билан қайтган давлатлар орасида Ўзбекистон ҳам бор. -52 кг вазн тоифасида юртимиз шарафини ҳимоя қилган Сита Кадамбаева терма жамоамизга ягона бронза медалини тақдим этди.