Нодирбек Абдусатторов амалдаги жаҳон чемпиони Гукешни қора доналарда мағлуб этди

Бугун дунё биринчилигининг иккинчи куни рапид бўйича яна 4 та тур учрашувлари ўтказилди. Нодирбек Абдусатторов 4 та партиядан 3 тасида ғалаба ва 1 тасида дуранг натижа қайд этди. Бугунга белгиланган сўнгги 9-турда қора доналарда ўйнаганига қарамай, амалдаги жаҳон чемпиони ҳиндистонлик Гукеш Доммараджуни чиройли тарзда мағлубиятга учратди. 

Бу билан Нодирбек 9 имкониятдан 7 очко жамғариб, қўшимча кўрсаткичларга кўра 6-ўринга кўтарилиб олди. Абдусатторов кечаги кунни 3,5 очко билан 55-ўринда якунлаган эди. Бугун у 6-турда бироз кутилмаганда бельгиялик гроссмейстер Даниэль Дарда билан дуранг ўйнади. Кейин эса кетма-кет америкалик Эндрю Хонг, испаниялик Максим Чигаев ва амалдаги тож соҳиби Гукеш Доммараджуни таслим эта олди.

Бугунги беллашувлардан сўнг FIDE байроғи остида ўйнаётган ва Магнус Карлсенга ҳозирча ягона мағлубиятни айнан бугун тақдим этган россиялик Владислав Артамьев 7,5 очко билан пешқадамлик қиляпти. АҚШ вакили Ханс Ниеманн ҳисобида ҳам 7,5 очко бор. Карлсен 7 очко билан кучли учликка якун ясаган. Тўртичи ва бешинчи ўриндаги Алексей Сарана ҳамда туркиялик Ягиз Эрдогмус ҳисобида ҳам 7 очкодан бор. 

Эртага рапид баҳслари давом эттирилади ҳамда ғолиб ва совриндорлар номи маълум бўлади.