Лицензия учун сўнгги имкониятдан фойдаланадиган аёллар кураши жамоамиз таркиби маълум

Барча қитъа курашчилари Париж-2024 Олимпиадасига бериладиган лицензияларни қўлга киритиш учун сўнгги имкониятдан фойдаланишади. Улар орасида табиийки, Ўзбекистон спорт курашлари терма жамоаси ҳам бўлади. Бишкекдаги Осиё лицензион турниридан кейин Ўзбекистон спорт курашларида 7 та лицензия бор. Яна 11 та Олимпиада йўлланмасини қўлга киритиш имконияти бор.   

Олимпия ўйинларида умумий ҳисобда 18 та вазн тоифасида медаллар жамланмаси ўйналади - эркин кураш (6 та), юнон-рум кураши (6 та) ва аёллар кураши (6 та). Абдурауф Бозорбоев мураббийлигидаги аёллар кураши терма жамоамиз Бишкекдаги турнирда 1 та лицензия қўлга киритиб, бу борада янги тарих саҳифаси очган эди. Актенге Кеунимжаева (-50 кг) ўз йўлланмаси билан Олимпиадада қатнашадиган биринчи ўзбек курашчиси сифатида тарихга киради. 

Бизга етиб келган маълумотларга таянадиган бўлсак, Истанбулдаги сўнгги лицензион турнирда 3 нафар курашчи қизимиз Париж-2024 Олимпия ўйинларига бериладиган йўлланмалар учун баҳс олиб боради. Шоҳида Аҳмедова (-53 кг), Лайлохон Собирова (-57 кг) ва Набира Эсенбаева (-68 кг) Истанбул гиламларида лицензиялар учун баҳсларга киришади.