Новак Жокович - тарих ёзган теннис қироли!

Энди у сўзсиз тарихдаги энг буюк теннисчи! Жокович бу ғалаба орқали "Катта Дубулға" турнирларидаги чемпионлик унвонлари сонини 23 тага етказиб олди. У 22 та "Улкан Тож" унвонига эга испаниялик Рафаэль Надални ортда қолдириб, эркак теннисчилар ўртасида ягона рекордчига айланди.

Гигант

Профессионал теннисда (1968 йилдан бери) у ҳозир Серена Уильямс билан чемпионлик рекордини бўлишмоқда. Яъни, айни пайтда икки теннисчида ҳам 23 тадан "Катта Дубулға" чемпионлиги бор. 

Агар ҳаваскорлар даврини ҳам ҳисобга оладиган бўлсак, уларни фақат 24 та “Катта Дубулға“ни қўлга киритган Маргарет Корт ортда қолдиради. Аммо унутмаслик керакки, унинг даврида рақобат даражаси анча паст эди. Айниқса, унинг севимли Австралия Очиқ чемпионатида. Шу билан бирга, Жокович эркаклар тенниси тарихидаги энг бой "Улкан Тож" тўпламига эга: фақатгина у тўртта "Катта Дубулға" турнирини уч мартадан ютган.

Жокович ва Лэйвер профессионал эркак теннисчилар тарихида кетма-кет тўртта "Катта Дубулға"да ғалаба қозонган ягона теннисчилардир. Австралиялик буни 1969 йилда амалга оширган, Жокович эса 2015-2016 йилларда. Аммо Лэйвердан фарқли ўлароқ, сербиялик буни бир йилда эмас, икки мавсумда амалга оширган.

Жокович ва Надаль бир мавсумда "Катта Дубулға"ни уч хил кортда ютган тарихдаги ягона эркак теннисчилардир. Испаниялик буни 2010 йилда ("Ролан Гаррос", "Уимблдон", US Open), сербиялик эса 2021 йилда (Australian Open, "Ролан Гаррос", "Уимблдон") амалга оширган.

36 ёшли Жокович ҳозирда энг кекса "Ролан Гаррос" чемпиони ҳисобланади. Бу борада у ўтган йили 36 ёшу 2 кунлигида чемпионликни қўлга киритган Надални ортда қолдирди.

Умуман олганда, очиқ даврда фақат икки теннисчи Жоковичдан катта бўлганида "Улкан Тож"ни ютган: Рожер Федерер (Australian Open-2018 да 36 ёшу 5 ой) ва Кен Роузолл (1972 йилги Australian Open'да 37 ёшу 2 ой).

Сербиялик 30 ёшдан кейин қўлга киритган "Катта Дубулға"лар сони бўйича умуман тарихда етакчи ҳисобланади. Унда бу кўрсаткич 11 тани ташкил этади. Жокович, шунингдек, "Катта Дубулға" финаллари бўйича ҳам рекордчи (34). Ва фақат у ҳар бир "Катта Дубулға" турнирида камида етти марта ҳал қилувчи ўйинга чиққан.

У ва Надаль битта "Улкан Тож"ни 10 ёки ундан ортиқ қўлга киритган ягона теннисчилардир. Жокович Australian Open'да 10 та, Надаль "Ролан Гаррос"да 14 та чемпионликка эга.

Бу ерда бир қизиқ жиҳат бор. Жокович Надални ўзининг энг кучли "Катта Дубулға" турнирида икки марта мағлуб этган, Надаль эса Австралия Очиқ чемпионатида - ҳеч қачон.

"Мастерс" турнирларига эътибор берадиган бўлсак, у ҳолда Жокович энг титулли теннисчи ҳисобланади. У 38 та чемпионликка эга (Надаль 36 та билан иккинчи) ва ушбу тоифадаги тўққизта турнирнинг барчасида ғолиб чиққан ягона спортчидир.

Шунингдек, у Якуний турнирда энг кўп чемпионлик рекордини Федерер билан бўлишиб турибди - олтита. Ҳозир эса унинг 67 та “Катта унвон“ ("Катта Дубулға", “Мастерс“, Якуний турнир ва Олимпиада) деб аталадиган унвонлари бор. Яна тарихдаги энг кўпи.

Унинг ҳисобида жами 94 та соврин бор. У бу кўрсаткич бўйича Иван Лендлга етиб олди ва фақат Федерер (103) ва Жимми Коннорс (109) дан ортда қолмоқда. "Ролан Гаррос" финалида Жокович Топ-10`даги теннисчига қарши ўйинда ўзининг 245-ғалабасини қўлга киритди - бу яна бир рекорд! Федерер 224 ғалаба билан иккинчи ўриндан жой олган.

Унинг кучли ўнталикдаги теннисчиларга қарши ғалабаси 69,2%. Фақат Бёрн Борг ундан яхшироқ кўрсаткичга эга - 71,1%.

Умуман олганда, Жокович 1268 ўйин ўтказиб, 1058 тасида ғалаба қозонган - 83,4%. Бу камида 500 та ўйин ўтказганлар орасида тарихдаги энг юқори кўрсаткичдир. Иккинчи ўринни эгаллаб турган Надаль 82,9 фоизга эга.

Сўнгги йилларда Сербия ва испаниялик АТР рейтингининг юқори поғонасидаги ўринларини мунтазам равишда алмашиб туришган бўлса, энди Новак ўзини етакчи сифатида кўрсатди.

"Ролан Гаррос"даги ғалаба туфайли Жокович рейтингнинг биринчи қаторига қайтди. Биринчи ўринда у аллақачон 387 ҳафтани ўтказган - бу эркаклар ва аёллар Тури учун рекорддир. Бу кетишда у кетма-кет 400 ҳафта рейтингда биринчи ўринни эгаллаган биринчи теннисчига айланади.

Шунингдек, у мавсумни етти марта рекорд натижа билан дунёнинг 1-ракеткаси сифатида якунлаган. Албатта, Жоковичда катта эҳтимол билан ҳали бери ҳеч бир теннисчи етолмайдиган рекордлар бор. Аммо унда тарихдаги энг буюк теннисчи деб ҳисобланиш учун аллақачон кўпроқ нарса бор.

Хуршида Абдикулова таржимаси