Қозоғистонлик Олимпиада совриндорига қамоқ жазоси белгиланди

Павлодар суди қозоғистонлик машҳур эркин курашчи, Олимпия ўйинларининг бронза медали совриндори Даулет Шабанбайга ҳукм чиқарди.

15 декабрь куни суд спортчини ҳокимият вакилларига нисбатан зўравонлик ишлатишда айбдор деб топди. У уч йилга озодликдан маҳрум қилиниб, жазо муддатини ўртача хавфсизлик колониясида ўташга ҳукм этилди.

Тергов маълумотларига кўра, жорий йилнинг сентябрь ойида Миллий гвардиянинг уч нафар ҳарбий хизматчисидан иборат патруль спортчини кечқурун кафе ёнида тўхтатган. Патруль хизматига эркак маст бўлгани, шовқин-сурон кўтаргани ва ўзини тажовузкор тутгани ҳақида хабар берилган.

Суҳбат давомида Шабанбай патруль ходимларини ҳақорат қилган ва куч ишлатган. Улардан бирини итариб юбориб, наряд бошлиғини тепган ва яна икки ҳарбий хизматчини урган. Шундан сўнг зўравон спортчи қўлга олинган.

Қизиғи, 120 кг вазн тоифасида курашган Даулет 2012 йилги Лондон Олимпиадасини 5-ўринда якунлаган. Эркин курашчи мукофотларни қайта тақсимлашдан сўнг Олимпия ўйинлари совриндорлари қаторига кирганди. 2019 йилда допинг-синамалар қайта текширилгандан сўнг, грузиялик курашчи Давид Модзманашвили ва Артур Таймазов (Ўзбекистон) тақиқланган моддалардан фойдалангани аниқланганди.

Барча муҳокамалардан сўнг, бу спортчиларни дисквалификация этилиб, уларнинг Лондон Олимпиадасида кўрсатган натижаларини бекор қилинганди.

Шу тариқа, Даулет Шабанбай Олимпиада совриндорига айланган ва унга орадан 10 йил ўтиб, 2022 йилда бронза медали топширилганди. Комил Гасеми (Эрон) ва Билол Махов шоҳсупанинг биринчи поғонасидан жой олган бўлса, америкалик Тервел Длагнев қозоғистонлик билан бирга учинчи ўринга кўтарилганди.