130 килограммлик гандболчини кўрдингизми? Конголик паҳлавон жаҳон чемпионатида ажойиб ҳаракат қилмоқда (+ВИДЕО)

Мусобақа доирасида ўтказилган Аргентина ва Конго Демократик Республикаси ўртасидаги ўйин барчани ҳайратга солди. Конголиклар жаҳон чемпионати тарихида ўзларининг биринчи ўйинларини ўтказишди. Гарчи жамоа 22:28 ҳисобида мағлубиятга учраган бўлса ҳам бу тарихий ҳодисага айланди.

Бу ўйиндаги энг ҳайратланарли ҳодиса 130 килограмлик гандболчи Готье Мвумби бўлди. Келинг ушбу гандболчи билан танишамиз:

1) Мвумби 26 ёш, Францияда туғилган ва "Dreux AC" ҳаваскор клубида фаолият олиб борган. 

2) Аргентина билан ўйинда у 11 дақиқа ҳаракат қилди ва 100 фоизлик натижа кўрсатди. 4та зарба ва 4та гол.

3) Чемпионатнинг расмий сайтида Мвумбининг бўйи 176 см, оғирлиги 89 кг. деб кўрсатилган. Трансляция вақтида эса бироз бошқача маълумот янгради: 192 см, 110 кг. Лекин, "La nacion" нашрининг хабар беришича Мвумби ҳозирги кунда 130 кг. оғирликка эга. 

4) Конголик "бўғирсоқ" сўнгги ўйинини 2020 йилнинг октябрь ойида ўтказган ва катта эҳтимол дам олиш пайтида ортиқча вазн тўплаган.

"Мен ҳеч қачон Дания каби терма жамоаларга қарши ўйин ўтказамиз деб ўйламаган эдим. Лекин, бизда йўқотадиган ҳеч нарса йўқ. Уларда ҳам, бизда ҳам иккита оёқ ва қўллар бор", - дея ўз фикрларини билдиради Готье Мвумби.

Конго Демократик Республикаси майдони бўйича Африкадаги иккинчи мамлакатдир. Ушбу мамлакат гандболда у қадар катта натижаларга эришмаган. Конгонинг энг яхши натижаси 1992 ва 2010 йилги Африка чемпионатларидаги 4-ўрин ҳисобланади.