Бугун Элнур ва Маҳмуд тарозидан ўтади, унгача эса вазн ҳайдалмоқда ФОТО

Ҳамюртларимиз тажрибали мутахассис, Ўзбекистон Республикасида хизмат кўрсатган мураббий Раҳматжон Рўзиохунов бошчилигида жангга ҳозирлик кўрмоқдалар. 

Бугун боксчиларимиз эртанги жанг олдидан тарозидан ўтишади. Унгача эса чарм қўлқоп усталаримиз машғулотларнинг сўнгги босқичини Екатеринбургда олиб бормоқдалар. Тайёргарлик доирасида вазн ҳам ҳайдалмоқда.

Ғоиповнинг рақиби россиялик Зураб Чаниев бўлади. 27 ёшли Чаниев 7та жанг ўтказган бўлиб, уларнинг 4тасида ғалаба қозонган. Иккита жангда рақибларини нокаутга учратган. Икки бор мағлубият аламини тотиб кўрган, биттаси нокаут билан. Яна бир жангда дуранг қайд этилган. Маҳмуд Ғоипов эса иккита жанг ўтказган ва ҳар иккисида рақибларини мағлуб этган. Ҳозирча сўнггиси бўлиб турган жангида арманистонлик Артуш Ховханнисянни очколар ҳисобига кўра мағлубиятга учратган эди. 

Элнур Абдураимов ҳам мезбон боксчига қарши рингга кўтарилади. Унинг рақиби Дмитрий Хасиев бўлади. Хасиев шу кунгача 11та жанг ўтказган. Жангларининг 8 тасида ғалаба қозонган (2 та нокаут). Битта жангда мағлубиятга учраган ва 2 та дуранг қайд этган.

Olamsport.com сайти эртанги жангда ҳар икки боксчимизга омад тилайди.