Ғоибназаровнинг мураббийи: Фазлиддинга кучли рақиб сўраб чарчадик

Фазлиддин саккизинчи жангида америкалик Майкл Фоксга қарши рингга кўтарилади. Бу баланд бўйли боксчини яна бир ҳамюртимиз Шоҳжаҳон Эргашев ҳам мағлуб этган эди. Биз рақиб аниқ бўлгач, Фазлиддиннинг мураббийи Аброр Турсунпўлатов билан боғландик ва бир нечта саволларга жавоб олдик. 

"Фазлиддиннинг рақибини мен ҳам, унинг ўзи ҳам бугун билдик. Бизга промоутерлар бу хабарни етказишди. Ким билан жанг ташкил қилиб беришса, ўша боксчи билан жангга тайёргарлик кўрамиз, рингга чиқамиз. Ҳозир Тусондамиз, Майкл Фоксга қарши жанг ҳам шу шаҳарда ўтказилади. 

Фокс Шоҳжаҳон Эргашевга ютқазган. Рақибни жиддий тарзда ўрганяпмиз. Унинг бўйи Фазлиддиндан 25 сантиметрча баландроқ. Биргина ноқулайлик туғдирадиган жиҳати ҳам шу. Очиғи, промоутерлардан кучли рақиб сўраб чарчадик. Майли, бу жангда ғалаба қозониб олса, рейтингда анча кўтарилиб олади. Кейинги жанглари кучли боксчиларга қарши кечади", - деди Турсунпўлатов.