Академик эшкак эшиш. Осиё чемпионати Ўзбекистон спортчилари учун муваффақиятли якунланди

Кеча ўтказилган баҳсларда ҳамюртларимиз 4та олтин, 1та кумуш ва 1та бронза медалларини қўлга киритганликлари ҳақида хабар бериб ўтгандик.

Мусобақанинг бугунги куни ҳам спортчиларимиз учун муваффақиятли кечди.

Ўсмирлар мусобақасининг JМ4 йўналишида стартга чиққан ўзбекистонлик спортчилар (Евгений Агафонов, Давржон Давронов, Тоир Толибов, Шухрат Шодиев) маррага биринчи бўлиб етиб боришди ва олтин медални қўлга киритишди. JM4x йўналишидаги баҳсларда қатнашган экипажимиз (Жасур Турғунов, Султонали Абдувалиев, Дилмурод Исматуллаев, Азизбек Нарзимуродов) бронза медалига сазовор бўлди.

Катталар ўртасидаги беллашувларнинг M8+ йўналишида ҳам олтин медаль ўзбекистонлик спортчилар (Зафар Усмонов, Шоҳжаҳон Нажмиев, Исламбек Мамбетназаров, Шехроз Хакимов, Алишер Яров, Анатолий Краснов, Отамурод Раҳимов, Достонжон Бахриев, Достонжон Хурсанов) га насиб қилди. Яна бир олтин медаль М4Х беллашувларида терма жамоамиз (Шахбоз Абдужабборов, Абдулло Мухаммадиев, Ўктамжон Давронов, Фаррух Астанов) ҳисобига ёзилди. Эътиборлиси, ушбу йўналишда кумуш медаль ҳам ўзбекистонлик спортчилар (Шахбоз Холмурзаев, Бекзод Холмирзаев, Абубакир Узоқбаев, Жасур Мавлонов)га насиб қилди. LM1x йўналишида қатнашган Жасур Мавлонов ҳам терма жамоамиз ҳисобига бронза медалини қўшиб қўйди.

Шу тариқа, спортчиларимиз Осиё чемпионатида умумий ҳисобда 7та олтин, 2та кумуш ва 3та бронза медалларини қўлга киритишди.