Академик эшкак эшиш. Осиё чемпионати қаҳрамонлари байрамона тарзда кутиб олинди

Нуфузли мусобақада иштирок этган ўзбекистонлик спортчилар умумий ҳисобда 7та олтин, 2та кумуш ва 3та бронза медалларини қўлга киритишганди.

Бугун мусобақада қатнашган спортчиларимиз юртимизга қайтиб келишди. Эшкак эшувчиларимизни Ислом Каримов номидаги Тошкент халқаро аэропортида Миллий олимпия қўмитаси ва Ўзбекистон "Rowing and Canoeing" федерацияси мутасаддилари, мухлислар, спортчиларнинг ота-оналари ҳамда оммавий ахборот воситалари ходимлари кутиб олишди.

"Жанубий Кореяда ўтказилган мусобақада муваффақиятли иштирок этдик ва ёруғ юз билан юртимизга қайтиб келдик. Яратиб берилган шароитлар учун муҳтарам Президентимизга, шунингдек, Миллий олимпия қўмитасига миннатдорчилик билдираман. Ушбу мусобақа Буэнос-Айресда бўлиб ўтадиган ўсмирлар Олимпия ўйинларига ўзига хос тайёргарлик вазифасини бажарди. Аргентинада ўтказиладиган нуфузли мусобақада ҳам муваффақиятли иштирок этишга ҳаракат қиламиз", - деди мусобақа ғолиби Евгений Агафонов.

"Осиё чемпионати биз учун ажойиб ўтди. Ватанимизга медаллар шодаси билан қайтганимиздан хурсандмиз. Турнир давомида Гонконг, Ҳиндистон вакиллари бизга яхшигина қаршилик кўрсатишди. Аммо, биз бўш келмадик ва ғолибликни қўлга киритдик. Энди Аргентинада ўтказиладиган Олимпия ўйинларида ҳам фаҳрли биринчи ўринни қўлга киритмоқчимиз", - деди Осиё чемпиони Давржон Давронов.

Ўзбекистон Миллий олимпия қўмитаси ушбу муваффақият билан спортчи ва мураббийларимизни табриклаб қолади ва яқинлашиб келаётган Осиё ўйинлари, шунингдек ўсмирлар Олимпия ўйинларида ҳам бундан кам бўлмаган муваффақиятларни кутади.