Алан Пикассо Наоя Иноуэдан қабул қилган фаолиятидаги илк мағлубиятига изоҳ берди

Пикассо 12 раунд тўлиқ давом этган чемпионлик жангида япониялик мутлақ жаҳон чемпионига ҳакамларнинг якдил қарори билан 111-117, 109-119, 108-120 ҳисобида имкониятни бой берганди. Фаолиятидаги илк мағлубиятини қабул қилиб олган Пикассо жанг ҳақида гапирар экан, жаҳон чемпиони бўлиш умидини йўқотмаганини ҳам урғулади.

"Бу жуда оғир жанг бўлди. Иноуэ ўта портловчи ва тезкор эди, - деди Пикассо The Ring нашрига берган интервьюсида. - Бироқ жангнинг сўнгги раундларида баъзи жиҳатларда устунликни ҳис қилдим, аммо яна тан оламан, жанг оғир кечди. Мен Иноуэдан янада оғирроқ, янада портловчи ва кучлироқ жангни кутгандим. Ўзимни мағлуб ҳис қилмаяпман ва ҳали ҳам жаҳон чемпиони бўлиш орзуим бор. Тайёрланиб, яна кучлироқ бўлиб қайтаман.

Маълумот учун, Алан Давид Пикассо проф боксда 34 та жанг ўтказиб, 32 ғалаба, 1 дуранг ва 1 мағлубият қайд этган. Наоя Иноуэга қарши Жаҳон чемпионлик камари учун жангдаги мағлубият унинг фаолиятидаги биринчиси бўлди.