“Баркамол авлод” ва “Универсиада” энди қай тартибда ўтказилади?

Йиғилишда Вазирлар Маҳкамасининг 2018 йил 25 октябрдаги “Ўқувчи ва талаба ёшлар ўртасида ўтказиладиган республика спорт мусобақалари тизимини янада такомиллаштириш тўғрисида”ги қарорида белгилаб берилган вазифалар ижроси таҳлил этилиб, “Баркамол авлод-2019” ва “Универсиада-2019” спорт мусобақаларининг Республика финал босқичини юқори савияда ташкил этиш ва ўтказиш чора-тадбирлари белгилаб олинди.

Дастлаб Вазирлар Маҳкамаси қарорида белгилаб берилган вазифаларнинг бажарилиши тўғрисида Жисмоний тарбия ва спорт вазири ўринбосари Шарифжон Мўминжонов маъруза қилди.

Шунингдек, йиғилишда ташкилий қўмита масъул котиби, Ўзбекистон талабалар спорти ассоциацияси раисининг биринчи ўринбосари Эркин Қодиров ва “Баркамол авлод-2019” ҳамда “Универсиада-2019” спорт мусобақаларининг Республика финал босқичини юқори савияда ташкил этиш ва ўтказиш билан боғлиқ сарф-харажатларни молиялаштириш масалалари юзасидан Олий ва ўрта махсус таълим вазирлиги Молиялаштириш ва бухгалтерия ҳисоби бошқармаси бошлиғи М.Ҳамроев ҳам сўзга чиқди.

Кун тартибига қўйилган масалалар атрофлича муҳокама қилиниб, мутасадди вазирлик, идора ва ҳокимлик раҳбарларининг таклифларини инобатга олган ҳолда ташкилий қўмита томонидан тегишли қарор қабул қилинди. 

Унга кўра, Касб-ҳунар коллежлари ўқувчи ёшлари ўртасида ўтказиладиган “Баркамол авлод-2019” ҳамда олий таълим муассасалари талабаларини қамраб олган “Универсиада-2019” спорт мусобақаларининг Республика финал босқичи ҳар йили спорт турлари бўйича навбатма-навбат, республиканинг барча ҳудудларида ўтказилиши, мазкур мусобақаларни юқори савияда ўтказиш учун Тошкент шаҳрида Республика штабини ташкил этиш ва Ўзбекистон талабалар спорти Ассоциациясига бириктириш белгиланди.

Шунингдек, барча мутасадди вазирлик, идора ва ташкилотлар, ҳокимликлар зиммасига “Баркамол авлод-2019” ҳамда “Универсиада-2019” спорт мусобақаларининг Республика финал босқичларини юқори савияда ташкил этиш ва ўтказиш юзасидан бир қатор тегишли вазифалар юкланди.