Бир ойдан кейин Лондонда ўтказиладиган UFC турнирининг асосий жанги тасдиқланди + ПОСТЕР

Оқшомнинг асосий жанги британиялик Леон Эдвардс ҳамда америкалик аралаш яккакураш устаси Шон Брэди ўртасида ўтказилади. Аслида яримўрта вазнда собиқ UFC чемпиони Леон Эдвардс ўз мухлислари кўз ўнгида австралиялик Жек Делла Маддаленага қарши октагонга чиқиши керак эди. Аммо UFC раҳбарлари Маддаленани бу карддан олиб, рақибсиз қолган Белал Муҳаммадга беришди. Натижада Леон рақибсиз қолиб кетди. Ташкилотчилар тезда унинг ўрнини Шон Брэди билан тўлдиришди.  

Эслатиб ўтамиз, Леон Эдвардс сўнгги бор ўтган йилнинг июль ойида Манчестерда ўтган турнирда айнан Белал Муҳаммадга очколар ҳисоби бўйича ютқазиб, ўз камарини бой берганди. Шон Брэди эса икки ғалабали серия билан келмоқда. У Келвин Гастелумни кимура усули билан мағлуб этган бўлса, Гилберт Бернсдан ҳакамлар қарорига кўра устун келганди. Айни пайтда Леон Эдвардс яримўрта вазн рейтингида биринчи, Шон Брэди эса бешинчи ўринни эгаллаб турибди.