Касаллик Жон Жонснинг UFC`га қайтишига тўсқинлик қиладими?

Икки вазн тоифасида собиқ UFC чемпиони ўз муаммоларини оммага ошкор қилмоқчи эмас эди, чунки у ҳали ҳам октагонга қайтишни режалаштирмоқда. Бу ҳақда Жонс ТМЗ нашри томонидан эълон қилинган тегишли баёнотда айтди.

"Афтидан, Хюстондаги DBX 5 турнири пайти саҳна ортида бўлиб ўтган шахсий суҳбатим оммага ошкор бўлди. Шундай бўлиб туради. Аксарият жангчилар сингари биз ҳам кўпинча жароҳатларни жимгина енгиб ўтамиз ва менинг ҳолатимда бу йиллар давомида содир бўлади. Кўпчилигимиз ҳар куни оқсоқланиб юрамиз, ўз фаолиятимиз учун соғлиғимиз билан ҳисоб-китоб қиламиз.

Агар бу ҳақиқатми деб ўйлаётган бўлсангиз, ҳа, ҳақиқат. Барча жанговар жароҳатларим учун миннатдорман ва агар ҳаммасини такрорлаш мумкин бўлса, ўйлаб ўтирмасдан яна такрорлаган бўлардим. Бу менинг бутун фаолиятим давомида ҳар куни эрталаб уйғонишимга сабаб бўлади.

Спорт тарихидаги энг унвонли жангчилардан бирига айланганимдан кейин ҳам танқидчиларим сўнгги йилларда суръатни пасайтирганим учун таъна қилишда давом этмоқда. Аммо бу бошқа куни жанг қилиш учун яшаш деб аталади - тегишли сабоқлар олиш ва уларни бизнесда қўллаш, октагонда эмас. Бу эволюция деб аталади.

UFC’да менинг артритим кўлами ҳақида билишади. Ва улар яна бир нарсани тушунишади: агар мен охирги марта ҳамма нарсани тикишга ва бундай оғриққа чидашга қарор қилсам, мукофот алоҳида нарса бўлиши керак - шунчаки катта гонорардан кўра каттароқ нарса. Мен учун бундай мукофот Оқ уйдаги турнирда бўлган ва шундай бўлиб қолади.

Бу жанг бўладими ёки йўқ, фаолиятим аллақачон оламшумул ва чинакам афсонага айланиб улгурди. Ўзимнинг катта қисмимни саккизбурчакда қолдирдим ва ҳар бир лаҳза учун миннатдорман. Адашманг - мен ҳали ҳам сизларнинг 99 фоизингизни парчалаб ташлайман. Ҳали ҳам залда оғир тошларни кўтаряпман. Ҳали ҳам машқ қиляпман. Ҳали ҳам кўпчиликдан кўра кўпроқ ишлаяпман, лекин энди фақат яхши чигалёзди машқларидан сўнг. Худо хайрингизни берсин. Жон Жонс!".

Афсонавий жангчи ўзининг артрит касаллиги ҳақида гапириб, нима учун RAF лигаси раҳбари Чад Бронштейн томонидан ташкил этилган Даниэль Кормьега қарши кураш беллашувини ўтказмоқчи эмаслигини тушунтирди.