"Андижон" ва Хомяков. ФИФА мураббий фойдасига қарор чиқарди

"Андижон" собиқ мураббийи Александр Хомяков қарздорлик билан боғлиқ муаммо сабаб ФИФАга мурожаат қилган эди.

Биз бу ҳақида Ўзбекистон футболчилар уюшмаси раҳбари Камолиддин Мурзоев билан боғландик. 

"Муаммо шундаки, "Андижон" ўтган мавсум ўртасида Хомяков билан шартномани бекор қилмай туриб янги мураббий билан шартнома имзолаган. Бундан ташқари маошлардан ҳам қарздорлик бўлган. Хомяков бу иш юзасидан ФИФАга мурожаат қилди. Якунда бу ишда ташкилот мураббий фойдасига қарор чиқарди. Эндиликда "Андижон" бу қарздорликни тўлиқ қоплаб бериши керак бўлади. Акс ҳолда клубга нисбатан трансфер таъқиқи қўйилади",- дейди Камолиддин Мурзоев. 

Александр Хомяков 2023 йил "Андижон" жамоаси бош мураббийи сифатида иш бошлаган. 2024 йил клуб билан Ўзбекистон Кубогида ғолиб чиққан. 2025 йил 6 май куни мутахассис жамоа билан хайрлашган. 

Маълумот учун, Суперлигада трансфер ойнаси 20 февраль куни ёпилади.