Биргина Истомин Палембангга учмади, нима учун?

Таркибдан Ўзбекистон Республикасида хизмат кўрсатган мураббий Самуғ Обидов бошчилигидаги теннисчиларимиз ҳам жой олишган. Эркаклар ўртасидаги баҳсларда Денис Истомин, Жўрабек Каримов, Санжар Файзиев ва Фаррух Дўстов иштирок этади. 

Қизларимиздан эса Ирода Тўлаганова сардорлигидаги Сабина Шарипова, Нигина Абдураимова ва Оқгул Омонмуродова медаллар шодаси учун кортларга чиқишади. Медаллар эркаклар ва аёллар ўртасидаги яккалик, жуфтлик ҳамда микст, яъни аралаш жуфтлик бўйича ўйналади. 

Яъни, биргина тенниснинг ўзидан 5та медал қўлга киритсак бўлади. Албатта, олтинлар кўпроқ бўлишини истаймиз. Лекин асосий умидимиз ҳисобланган Денис Истоминни Куала-Лумпур аэропорти назоратчилари Палембангга учишини исташмади. 

Гап шундаки, унинг паспортидаги кириш ва чиқишни рўйхатдан ўтказувчи муҳр қўйиладиган варақлари тўлиб қолган. Бошқача бўлиши ҳам мумкин эмас. Денис ҳар ҳафта янги бир турнирда иштирок этади. 

Айнан шу кичик сабаб билан Истоминнинг жамоамиз билан бирга учишига йўл қўйишмади. Варақда муҳр сиғадиган жой ҳам бор эди. Аммо, улар қайтишда нима бўлади, деган важни илгари суришди. 

Хуллас, мамлакатимизнинг биринчи ракеткаси куннинг иккинчи ярмидаги рейс билан Палембангга етиб келиши керак. Ҳар ҳолда мутахассисларимиз шу масалада шуғулланишяпти. Тез орада Истомин таркибга келиб қўшилади.