Бироздан сўнг Сакен Пулатов бокс федерациясига раҳбар этиб тайинланади

Унда бир нечта масалалар кўриб чиқилади. Улар орасида Ўзбекистон бокс федерациясига янги вице-президентни тайинлаш энг муҳими ҳисобланади. Бир неча йил давомида ушбу лавозимда самарали ишлаб келган Шерзод Тошматов бугун ўз вазифасидан озод этилади. 

Унинг ўрнига бир анчадан бери "Локомотив" клуби тизимида ишлаб келаётган, жамоа муассисларидан бири, тадбиркор Сакен Пулатов вице-президент этиб тайинланади. Бу тайинловнинг қанчалик тўғри эканлигини эса вақт кўрсатади. 

Ҳар ҳолда Шерзод Тошматов спорт, хусусан бокс одами эди. Натижалар ҳам буни исботлайди. Аввалига Ўзбекистон муайтайини юқори чўққига олиб чиққан Тошматов кейинчалик юртимизни дунёнинг биринчи рақамли бокс мамлакатига айлантирди. 

Айнан боксчиларимизнинг юксак натижалари сабаб Ўзбекистон терма жамоаси Рио Олимпиадасида, кейин эса Осиё ўйинларида тарихий натижани қайд этди. Чарм қўлқоп усталаримиз томонидан қўлга киритилган медалларни санамасак ҳам буни ўзингиз жуда яхши биласиз. 

Энди ҳақли савол туғилади: натижалар кутилганидан ҳам ижобий бўлиб турган бир пайтда раҳбарни ўзгартириш шартмиди? Бунга қандай эхтиёж сезилди? Бу ўзгартириш кимга ва нима учун керак бўлиб қолди? Саволлар бисёр, жавобни эса бугунги йиғилишдан сўнг билиб оламиз. 

Маълумот учун, Ўзбекистон Республикаси бош вазирининг биринчи ўринбосари Очилбой Раматов бир вақтнинг ўзида ҳам бокс федерацияси, ҳам футбол ассоциацияси президенти ҳисобланади. 

Суратда - Шерзод Тошматов