02 сен 13:15
Янгиликлар

Бокс/ММА

Боб Арум: “Пакьяо келаси йили Хорн билан реванш жанги ўтказади”

Саккиз вазн тоифасида собиқ жаҳон чемпиони Мэнни Пакьяонинг промоутери Боб Арум бу йил филиппинлик боксчининг бошқа жанг ўтказмаслигини тасдиқлади.

Аввалроқ, 38 ёшли Пакьяонинг куз ойларида австралиялик Жефф Хорнга қарши реванш жангида рингга кўтарилиши ҳақидаги хабарлар чоп этилган эди. Лекин Арум бу жанг келаси йили ўтказилишини маълум қилди.

“Пакьяо сенаторлик мажбуриятлари сабаб бу йил бошқа жанг ўтказа олмайди. Хорнга қарши реванш жанги келаси йили ўтказилади ва бу энг тўғри ҳамда мақбул вариант”, — деди Арум.

Эслатиб ўтамиз, 2 июль куни Австралияда ўтган жангда Хорн ҳакамлар қарорига кўра Пакьяони мағлубиятга учратиб, WBO чемпионлик камарини номдор рақибидан тортиб олганди.