Богдан Гусков Анкалаевдан учралган мағлубият ҳақида: "Ҳеч нарсадан афсусланмайман"

"Ваъда қилганимдек, жангим ҳақида қисқача видео-изоҳ. Буни ўзимни оқлаш деб қабул қилишингизни истамасдим. Шунчаки ўз фикрларим, холос. Биринчидан, бу жанг кейинги сафар чемпионлик учун курашишимга катта имконият бўлишини тушуниб турган эдим. Шу билан бирга, бу катта таваккал ҳам эди, чунки бутун тайёргарлик жараёнини бутунлай бошқа рақибга қарши ўтказгандим. У ўнг қўл билан ишлайдиган, кўпроқ зарбачи ва уч раундлик жанг учун мўлжалланган эди. Якунда эса чап қўл билан ишлайдиган, беш раундлик ва универсал жангчи — умуман бошқача услубдаги рақибга қарши чиқишга тўғри келди.

Нимадандир афсусдаманми? Йўқ, ҳеч нарсадан афсусланмайман. Агар натижани олдиндан билганимда ҳам, барибир бу ишга қўл урган бўлардим. Чунки ўзим учун кўп нарсани англаб етдим. Буни келгуси ҳаракатларим учун бир чақириқ ва ҳеч қандай пулга сотиб олиб бўлмайдиган катта тажриба сифатида қабул қиламан.

Таваккалчилик ҳақида. Ҳа, қаердадир кўпроқ таваккал қилиб, олдинга интилишим мумкин эди. Лекин Маганинг мени пойлаётганини кўриб турардим — шунчаки ўзимни оловга ташлаш... Мен уни кўпроқ қарши ҳужумда ушлаб олишга ва иккинчи рақам остида ишлашга ҳаракат қилдим. Икки қарши ҳужумчи тўқнаш келди. Шундай бўлиб туради. Жанг зерикарли бўлди — розиман. Кўп ёзишяпти, бу изоҳларни кўряпман. Лекин, яна қайтараман, бу уруш эмас, балки шахмат партияси каби кечди. Шунинг учун кимни бироз хафа қилган бўлсам, мендан қаттиқ хафа бўлманглар.

Биз олдинга ҳаракат қилишда давом этамиз, дўстларим. Қўллаб-қувватлаганингиз учун, ёнимда бўлганингиз учун, изоҳлар ёзиб, мени қўллаб-қувватлашда давом этаётганингиз учун ҳаммангизга катта раҳмат. Бу келгуси ҳаракатларим учун ҳақиқатан ҳам катта мотивация беради, чунки сизларсиз бу спорт умуман бўлмасди. Буни кўп марта айтганман. Шундай экан, бу ҳали охири эмас. Ҳаммаси олдинда, барчасини кўрасизлар. Яхши жанглар ҳам, чиройли тактик жанглар ҳам бўлади. Ҳаммангизни қучоқлаб қоламан. Алоқадамиз", — деди Богдан ўзининг Телеграм-каналида эълон қилган видеода.