Бокс бўйича ЖЧ-2019 Россиянинг бошқа шаҳрига кўчирилди

Аслида дунё биринчилиги Россиянинг бошқа бир шаҳри - Сочида ўтказилиши керак эди. Пойтахт Москва шаҳри ҳам мезбонликка даъвогар бўлиб турганди. Лекин мезбонлар якунда жаҳон чемпионатини Екатеринбургда ўтказишга қарор қилишди. 

Екатеринбург Бутунжаҳон бокс суперсериясининг чорак финал жангларини юқори савияда ўтказганидан сўнг Россия бокс федерацияси ўз қарорига ўзгартириш киритиб, мезбонликни айнан Урал марказига топширди. 

Жаҳон чемпионати баҳслари ўз бағрига 15 000 томошабинни сиғдира олувчи МВЦ “Екатеринбург-ЭКСПО” аренасида ўтказилади. Чемпионатнинг аниқ санаси келаси ҳафта Москвада ўтказиладиган Халқаро ҳаваскор бокс ассоциацияси (AIBA) Конгрессида эълон қилинади. Ушбу жаҳон чемпионатига Россиядан ташқари Ҳиндистон, Украина, Таиланд ва Туркия давлатлари ҳам даъвогарлик қилганди.