27 апр 07:29
Янгиликлар
Бугун енгилмас 20 ёшли боксчимиз Нью-Делида рингга чиқади, кеча тарози маросими бўлиб ўтди ФОТО
Оқшом доирасидаги қизиқарли жанглардан бири ҳамюртимиз иштирокида кечади. Профессионал боксда мағлубиятсиз одимлаётган чарм қўлқоп устамиз Улуғбек Собиров тўққизинчи жангини ўтказади. 20 ёшли боксчимиз 8 раундлик жангда ҳиндистонлик 23 ёшли Пардип Харрерага қарши рингга кўтарилади.
Кеча боксчилар анъанага кўра тарозидан ўтиш маросимида иштирок этишди. Иккала боксчи ҳам белгиланган вазн меъёрини бажаришди.
Маълумот учун, Улуғбек Собиров профессионал фаолияти давомида 8 та жанг ўтказиб, уларнинг барчасида ғалаба қозонган. Бешта жангини муддатидан олдин ўз фойдасига ҳал қилган.
Унинг рақиби Пардип ҳам проф рингда 8 та жанг ўтказган. Ҳисобида 5 та ғалаба ва 3 та мағлубият бор. Тўртта жангда рақибларини нокаут қилган ва ўзи ҳам бир бор шу ҳолатга тушиб қолган.
Эслатиб ўтамиз, Улуғбек Собиров ўзининг ҳозирча сўнггиси бўлиб турган баҳсида 45 та жанг ўтказган индонезиялик Стив Фердинандусни очколар ҳисобига кўра мағлубиятга учратган эди.
Фикрлар